وفاقی حکومت کا وزارت داخلہ کی سیکیورٹی کلیئر نس کے بعد جرمن نژاد برن ہلڈن برانڈ کو پی آئی اے کا مستقل چیف ایگزیکٹو آفیسر بنانے کا فیصلہ

برن ہلڈن برانڈ اس وقت قائم مقام چیف ایگزیکٹو کے طور پر ذمہ داریاں سرانجام دے رہے ہیں

اتوار 4 دسمبر 2016 18:40

اسلام آباد(اُردو پوائنٹ اخبارتازہ ترین - آئی این پی۔ 04 دسمبر2016ء) وزارت داخلہ کی طرف سے جرمن نژادبرن ہلڈن برانڈکی سیکیورٹی کلیئرنس ہونے کے بعد وفاقی حکومت کا انہیں پاکستان انٹرنیشنل ائیر لائن(پی آئی ای)کا مستقل چیف ایگزیکٹو آفیسر بنانے کا فیصلہ ، برن ہلڈن برانڈ اس وقت قائم مقام چیف ایگزیکٹو کے طور پر ذمہ داریاں سرانجام دے رہے ہیں۔

اتوار کو ذرائع کے مطابق ایوی ایشن ڈویژن کی طرف سے برن ہلڈن برانڈ سے بار بار مانگنے کے باوجود وہ تعلیمی اسناد فراہم نہیں کر رہے ، برن ہلڈن برانڈ اس وقت 26لاکھ روپے ماہانہ تنخواہ لے رہے ہیں جبکہ ان کی مراعات و دیگر الائونسز بنیادی تنخواہ سے کہیں زیادہ ہیں اور وہ مہینے میں زیادہ وقت جرمنی گزارتے ہیں۔ذرائع کے مطابق برن ہلڈن برانڈ کو جب پی آئی اے میں تعینات کی گیا تو اس وقت ان کی سیکیورٹی کلیئرنس نہیں کرائی گئی تھی،پارلیمنٹ میں سیکیورٹی کلیئرنس کا معاملہ اٹھائے جانے پر اب وزارت داخلہ نے ان کی سیکیورٹی کلیئرنس کردی ہے۔

(جاری ہے)

ذرائع کے مطابق برن ہلڈن برانڈ کو سی ای او تعینات کرنے کی سمری رواں ہفتے وزیراعظم آفس ارسال کردی جائے گی،وزیراعظم کی منظوری کے بعد برن ہلڈن برانڈ کو مستقل سی ای او تعینات کرنے کا باضابطہ نوٹیفکیشن جاری کردیا جائے گا۔(خ م+آچ)