پنجاب کے بڑے شہروں میں فوڈ اتھارٹی کی چیکنگ،3دکانیں سیل،15کووارننگ

لاہور(اردوپوائنٹ اخبارتازہ ترین۔یکم دسمبر2016ء) :پنجاب فوڈ اتھارٹی نے بیکریوں ‘ ریستورانوں اور کھانے پینے کی دیگر دکانوں پر چیکنگ کر کے 3کو سیل‘ 15کو وارننگ‘ دیگر کو ہزاروں روپے جرمانہ کر دیا۔ پنجاب فوڈ اتھارٹی کے ڈائریکٹر جنرل نورالامین مینگل کی ہدایت پر فوڈ اتھارٹی ٹیم علامہ اقبال ٹاؤن نے کسانہ فوڈز ملتان روڈ‘ ماشاء اللہ سردار ہوٹل‘ الباسط ملک شاپ‘ شیخ جی سویٹس اینڈ بیکرز جی ٹی روڈ چونگی سٹاپ کو صفائی کی ناقص صورتحال‘ غیرمعیاری غذائی اجزا‘ حشرات الارض کی موجودگی‘ کھانے کی اشیا پر لیبل وغیرہ نہ ہونے پر ہزاروں روپے جرمانہ کر دیا جبکہ مغل پورہ میں ڈیسنٹ لڈوپیٹھی کے پروڈکشن یونٹ‘ وفاقی کالونی میں ندیم سویٹس کے پروڈکشن یونٹ‘ جلو موڑ پر شبیر سویٹس‘ سمن آباد میں کراچی اچانک بریانی کے پروڈکشن یونٹ کو ناقص صفائی‘ غیرمعیاری غذائی اشیاء‘ حشرات الارض کی موجودگی اور دیگر خلاف ورزیوں کی بنا پر سیل کر دیا۔

(جاری ہے)

گوجرانوالہ میں اروپ ٹاؤن میں اصلی مکہ مرغ دال چاول کو ناقص انتظامات کی بناپر 10ہزار روپے جرمانہ جبکہ رمضان سویٹس کو سیل کر دیا۔ فوڈ اتھارٹی ٹیم نے بھولا ملک شاپ‘ فریش جوس کارنر‘ ملک جی مرغ چنے‘ حاجی عبدالغنی امرتسری پائے‘ سپرچکن بریانی نندی پور‘ سیٹلائٹ ٹاؤن میں مدینہ ہوٹل‘ بسم اللہ ملک شاپ اور سویٹ ہاؤس کو صفائی کے ناقص انتظامات پر وارننگ جاری کر دی۔

فیصل آباد میں جھنگ روڈ پر مدینہ مرغ چنے‘ داتا مرغ چنے‘ بغدادی حلیم‘ بسم اللہ مرغ چنے‘ عبدالقیوم سموسہ کارنر اور پیپلزکالونی میں زین بیکرز اینڈ ڈیریز کو صفائی کے انتظامات اور حشرات الارض کی روک تھام کے اقدامات کی وارننگ جاری کی۔ راولپنڈی میں فوڈ اتھارٹی ٹیم نے فیصل شاہد روڈ ٹیکسلا میں النورانی بریانی اور نان سینٹر ‘ چاندنی چوک میں سائیں جی مرغ پلاؤ اینڈ ریسٹورنٹ کو ایف آئی ایف او سسٹم استعمال نہ کرنے ‘ صفائی کے ناقص انتظامات اور اشیاء کی دیکھ بھال نہ کرنے پر ہزاروں روپے جرمانہ کر دیا۔ کرتاریاں مارکیٹ میں گلگت بلتستان ریفریشمنٹ سنٹر‘ مقدس سموسہ کارنر اور کشمیر ملک شاپ کو صفائی کے ناقص انتظاما ت پر وارننگ جاری کر دی۔