سی پیک منصوبہ کی تکمیل سے مال بردار گاڑیوں کی تعداد میں رواں مالی سال کے دوران 20 ہزار کے اضافہ کا امکان

ملک کی اہم موٹر ویز، بڑی شاہراہوں اور مختلف شہروں کی سڑکوں پر چلنے والے ٹرکوں کی تعداد دوگنا ہو جائے گی

اتوار 27 نومبر 2016 14:30

اسلام آباد (اُردو پوائنٹ اخبارتازہ ترین - این این آئی۔ 27 نومبر2016ء) چین پاکستان اقتصادی راہداری منصوبے (سی پیک) کی تکمیل سے مال بردار گاڑیوں کی تعداد میں رواں مالی سال کے دوران 20 ہزار کے اضافہ کا امکان ہے۔

(جاری ہے)

پاکستان آٹو موٹو ایسوسی ایشن (پاما) کی رپورٹ کے مطابق اس وقت ملک میں 2 لاکھ 63 ہزار مال بردار ٹرک کام کر رہے ہیں جن میں 12ہزار آئیل ٹینکرز اور 1900 واٹر ٹینکرز بھی شامل ہیں۔ رپورٹ کے مطابق جاری مالی سال کے اختتام تک ان کی تعداد میں بیس ہزار یونٹس کا اضافہ متوقع ہے۔ سی پیک کی تکمیل سے ملک کی اہم موٹر ویز، بڑی شاہراہوں اور مختلف شہروں کی سڑکوں پر چلنے والے ٹرکوں کی تعداد دوگنا ہو جائے گی جس سے اقتصادی سرگرمیوں کے فروغ میں مدد ملے گی اور قومی معیشت ترقی کرے گی۔