چیف آف آرمی سٹاف کا پاک فضائیہ کا الوداعی دورہ، پاک فضائیہ کے چاق وچوبند دستے نے سلامی دی

پاکستان آرمی اور فضائیہ نے ضرب عضب کے دوران مل کر کام کیا ،ائیرچیف کی آرمی چیف سے ملاقات میں گفتگو جنرل راحیل شریف کی فضائی محافظوں کی ذمہ داری اور جذبہ کی تعریف، مسلح افواج میں بہترین ہم آہنگی پر اطمینان کا اظہار

ہفتہ 26 نومبر 2016 11:51

چیف آف آرمی سٹاف کا پاک فضائیہ کا الوداعی دورہ، پاک فضائیہ کے چاق ..

اسلام آباد(اُردو پوائنٹ اخبارتازہ ترین - آئی این پی۔ 26 نومبر2016ء) چیف آف آرمی سٹاف جنرل راحیل شریف نے آج ائیر ہیڈ کوارٹرز اسلام آبادکا دورہ کیا۔ ایئر ہیڈ کوارٹر اسلام آبادآمد پر پاک فضائیہ کے سربراہ ائیرچیف مارشل سہیل امان نے ان کا استقبال کیا۔ پاک فضائیہ کے ایک چاق وچوبند دستے نے انہیں سلامی پیش کی ۔ اس کے بعد پرنسپل سٹاف آفیسر ز کا آرمی چیف سے تعارف کرایا گیا۔

بعد ازاں جنرل راحیل شریف نے پاک فضائیہ کے سربراہ ائیر چیف مارشل سہیل امان سے اُن کے آفس میں الوداعی ملاقات کی۔

(جاری ہے)

پاک فضائیہ کے سربراہ نے جنرل راحیل کی پاکستانی دفاع کی مضبوطی اور تینوںافواج کے درمیان مشترکہ و مربوط حکمت عملی کے حصول میں اپنا کردارادا کرنے پر انکی تعریف کی ۔ انہوں نے مزید کہا کہ پاکستان آرمی اور پاک فضائیہ نے آپریشن ضرب عضب کے دوران مل کر کام کیا تا کہ ملک سے دہشتگردی کے ناسور کا خاتمہ کیا جا سکے۔ جنرل راحیل شریف نے ائیر چیف سے گفتگو کے دوران قوم کے فضائی محافظوں کی ذمہ داری اور جذبہ کی تعریف کی اور دونوں مسلح افواج کے درمیان موجود بہترین ہم آہنگی پر اطمینان کا اظہار کیا اور اس خواہش کا اظہار کیا کہ اسے مستقبل میں مزید بڑھایا جائے۔