پاکستان یوکرائن کے ساتھ اپنے تعلقات کو انتہائی اہمیت دیتا ہے اور دوطرفہ تعلقات کو مزید مستحکم کرنے کے لئے پر عزم ہے۔ صدرمملکت ممنون حسین

کراچی ۔ (اُردو پوائنٹ اخبارتازہ ترین - اے پی پی۔ 23 نومبر2016ء) صدر مملکت ممنون حسین نے کہا ہے کہ پاکستان یوکرائن کے ساتھ اپنے تعلقات کو انتہائی اہمیت دیتا ہے اور دوطرفہ تعلقات کو مزید مستحکم کرنے کے لئے پر عزم ہے۔ بدھ کو جاری کردہ اعلامیہ کے مطابق انہوں نے یہ بات کراچی میں یوکرائن کے دفاع کے وزیر جنرل سٹیفن پولٹورک سے ملاقات کے دوران کہی۔

ملاقات میں دفاعی پیدوار کے وفاقی وزیر رانا تنویر حسین، سیکریٹری دفاع جنرل (ر) سید محمد اویس اور پاکستان میں یوکرائن کے سفیر بھی شامل تھے۔ صدر مملکت نے کہا کہ پاکستان اور یوکرائن کے درمیان تجارتی حجم بڑھانے کی ضرورت ہے تاکہ تعلقات میں مزید اضافہ ہوسکے۔ انہوں نے اس امید کا اظہار کیا کہ پاکستان کو فراہم کئے جانے والے تجارتی سازو سامان میں حائل رکاوٹوں کو جلد دور کر دیا جائے گا۔

(جاری ہے)

صدر مملکت نے کہا کہ پاکستان انفارمیشن ٹیکنالوجی،تعمیرات اور جہاز سازی کے شعبوں میں یوکرائن کی تکنیکی مہارتوں سے فائدہ حاصل کرنے کا خواہش مند ہے۔ انہوں نے کہا کہ دونوں ملکوں کو باہمی تعاون اور تجارت میں اضافے کے لئے ویزے کی شرائط میں نرمی کرنی چاہیے۔ انہوں نے کہا کہ پاکستان اور یوکرائن کے درمیان تعلیم و تحقیق کے شعبوں میں مضبوط تعاون کی ضرورت ہے۔

صدر مملکت ممنون حسین نے دونوں ممالک کو ثقافت کے فروغ، کھیل، انسانی وسائل کی ترقی اور لیبر کے تبادلے کے شعبوں میں بھی تعاون بڑھانے پر زور دیا۔ اس موقع پر یوکرائن کے دفاع کے وزیر جنرل سٹیفن پولٹورک نے کہا کہ وہ دفاعی پیداوار کے شعبے میں پاکستان کی ترقی سے متاثر ہوئے ہیں اور پاکستان کے تجربات سے فائدہ اٹھانے کے خواہش مند ہیں۔