آرمی چیف کا الوداعی ملاقاتوں کا آغاز قابل تحسین ہے،، اس سے بے یقینی کا خاتمہ ہواہے

امیر جماعت اسلامی پاکستان سینیٹر سراج الحق کابیان

پیر 21 نومبر 2016 22:24

آرمی چیف کا الوداعی ملاقاتوں کا آغاز قابل تحسین ہے،، اس سے بے یقینی ..

لاہور (اُردو پوائنٹ اخبارتازہ ترین - آئی این پی۔ 21 نومبر2016ء) امیر جماعت اسلامی پاکستان سینیٹر سراج الحق نے کہاہے کہ چیف آف آرمی سٹاف جنرل راحیل شریف نے الوداعی ملاقاتوں کا آغاز کردیاہے ، جو قابل تحسین ہے، اس سے بے یقینی کا خاتمہ ہواہے جو ملک و قوم کے لیے نیک شگون ہے ۔

(جاری ہے)

پیر کو اپنے ایک بیان میں انہوں نے کہاکہ قوم جنرل راحیل شریف کی بصیرت کو سلام پیش کرتی ہے جنہوں نے اپنے دور میں نہ صرف ملک کو درپیش اندرونی خطرات کو دورکرنے کے لیے جرأت مندانہ پالیسی اختیار کی بلکہ بھارت کے جنگی عزائم کو بھی ناکام بنایا ۔

انہوں نے کہاکہ کرسی پر بیٹھے رہنے کی بجائے اگر قوم کے دل و دماغ میں جگہ بنائی جائے تو وہ کہیں زیادہ بہتر ہے جس کی بہترین مثال چیف آف آرمی سٹاف جنرل راحیل شریف نے پیش کی ہے ۔ ہم سمجھتے ہیں کہ تمام قومی اداروں کے سربراہان کو اس مثال کو مشعل راہ بنانا چاہیے ۔ انہوں نے کہاکہ ایک فرد کے بجائے اجتماعی بصیرت پر انحصار کرناچاہیے ۔ فرد واحد کی پالیسیاں جمہوریت اور سیاست سمیت ہر جگہ ہمیشہ مسائل کا سبب بنتی ہیں ۔