کراچی پولیس نے کلفٹن کے علاقے سے اسلحہ کی بڑی مقدار برآمد کر لی

جمعہ 11 نومبر 2016 12:07

کراچی (اُردو پوائنٹ اخبارتازہ ترین - آئی این پی۔ 11 نومبر2016ء) کراچی میں قانون نافذ کرنے والے ادارے نے اولڈ کلفٹن میں چھاپہ مار کر بڑی تعداد میں اسلحہ برآمد کر لیا۔ اسلحہ میں 23 رائفلز اور بڑی تعداد میں گولیاں اور میگزین برآمد کی گئیں ۔ کراچی پولیس نے اسلحہ کی برآمدگی کو بڑی کامیابی قرار دیا ۔ کراچی میں عزیز آباد اور لیاری سے برآمد ہونے والی اسلحے کی بڑی کھیپ کے بعد کراچی پولیس نے کلفٹن کے علاقے سے اسلحہ کی بڑی مقدار برآمد کر لی۔

(جاری ہے)

کراچی پولیس کے مطابق خفیہ اطلاع پر اولڈ کلفٹن کے علاقے میں کچرا کنڈی سے بڑی مقدار میں اسلحہ برآمد کیا گیا۔ اسلحے میں 7 ایم فور رائفلز، 6 سب مشین گن، 2 سیون ایم ایم رائفلز ہیں۔ اسلحے کی برآمدگی کے دوران 2 پولیس کیپ اور 2 خنجر بھی برآمد ہوئے ۔ 2 نائن ایم ایم پستول سمیت 4 پستول بھی ملے ہیں جبکہ دیگر اسلحے میں 2 پوائنٹ 223 رائفلز، 4 بارہ بور، ایک جی 3، ایک 222 رائفل بھی شامل ہے۔ اسلحے کی برآمدگی کا مقدمہ بوٹ بیسن تھانے میں دہشت گردی کی ایکٹ کے تحت درج کر لیا گیا ۔