جھوٹے الزامات لگانے والوں کو عدالت میں شرمندگی اٹھانا پڑے گی٬ مریم اورنگزیب

وزیراعظم خود کو احتساب کے لیے پیش کر چکے ہیں ٬ مریم نواز باقاعدگی سے ٹیکس دیتی ہیں ٬ وہ لوگ جن کی سیاست جھوت پر مبنی ہے اور وہ عدالت اور تحقیقاتی کمیشن سے بھاگ رہے تھے٬ انہیں پتہ چل جانا چاہیے کہ کنٹینر اور عدالت میں بہت فرق ہوتا ہے٬ عدالت دھمکیوں پر نہیں ثبوتوں کی بنیاد پر فیصلہ دیتی ہے٬ حسن نواز٬ حسین نواز اور مریم نواز نے اپنے جوابات جمع کرادیئے ہیں٬ عوامی عدالت میں مقابلہ نہ کرسکنے والے مائنس نواز شریف چاہتے ہیں٬ پہلے نواز شریف کو ایٹمی دھماکوں کی سزادی گئی٬ اب انہیں سی پیک کی سزا دی جارہی ہے٬ پہلے نواز شریف کو جلا وطن کیا گیا لیکن ہم عوام کی عدالت میں سرخرو ہوئے٬ تحریک انصاف سڑکوں پر عدالتیں لگانے کی شوقین ہے٬ عمران خان کو مان لینا چاہیے کہ اب فیصلے سڑکوں پر نہیں ہونگے وزیر مملکت برائے اطلاعات مریم اورنگزیب ٬طارق فضل چوہدری اور طلال چوہدری کی سپریم کورٹ کے باہر میڈیا سے گفتگو

پیر 7 نومبر 2016 11:22

اسلام آباد(اُردو پوائنٹ اخبارتازہ ترین - آئی این پی۔ 07 نومبر2016ء) وزیر مملکت برائے اطلاعات مریم اورنگزیب نے کہاہے کہ جھوٹے الزامات لگانے والوں کو عدالت میں شرمندگی اٹھانا پڑے گی ۔سپریم کورٹ کے باہر میڈیا سے گفتگوکرتے ہوئے مریم اورنگزیب نے کہا کہ وزیراعظم خود کو احتساب کے لیے پیش کر چکے ہیں٬ وزیراعظم نے کہا ہے کہ اس معاملے کی شفاف اور غیر جانبدار تحقیقات ہوں٬ مریم نواز باقاعدگی سے ٹیکس دیتی ہیں ٬ وہ لوگ جن کی سیاست جھوت پر مبنی ہے اور وہ عدالت اور تحقیقاتی کمیشن سے بھاگ رہے تھے٬ انہیں پتہ چل جانا چاہیے کہ کنٹینر اور عدالت میں بہت فرق ہوتا ہے۔

عدالت دھمکیوں پر نہیں ثبوتوں کی بنیاد پر فیصلہ دیتی ہے اور تحریک انصاف ہمیشہ ثبوت لانیمیں ناکام رہی ہے٬ جھوٹے الزامات لگانے والوں کی عدالت میں بھی شرمندگی اٹھانا پڑے گی۔

(جاری ہے)

وزیر مملکت برائے کیڈ طارق فضل چوہدری نے کہا کہ حسن نواز٬ حسین نواز اور مریم نواز نے اپنے جوابات جمع کرادیئے ہیں۔ اس موقع پر مسلم لیگ (ن) کے رہنما طلال چوہدری نے کہا کہ عوامی عدالت میں مقابلہ نہ کرسکنے والے مائنس نواز شریف چاہتے ہیں٬ پہلے نواز شریف کو ایٹمی دھماکوں کی سزادی گئی٬ اب انہیں سی پیک کی سزا دی جارہی ہے٬ پہلے نواز شریف کو جلا وطن کیا گیا لیکن ہم عوام کی عدالت میں سرخرو ہوئے۔

پھر پاکستان میں فساد اور انتشار پھیلا کر نواز شریف کو مائنس کرنے کی کوشش کی گئی٬ اب وہ تمام ہارے ہوئے لوگ عدالت میں مائنس ون کی کوششیں کررہے ہیں۔ تحریک انصاف سڑکوں پر عدالتیں لگانے کی شوقین ہے٬ عمران خان کو مان لینا چاہیے کہ اب فیصلے سڑکوں پر نہیں ہوگے۔ تحریک انصاف کو عوامی عدالت میں شکست دی ہے اور اب عدالتی جنگ میں بھی ہرائیں گے۔