جنرل راحیل شریف اپنی مدت ملازمت میں توسیع نہیں لیں گے٬ وہ اپنی ملازمت پوری ہونے پر گھر چلے جائینگے٬عبدالقادر بلوچ

دوران ملازمت جنرل راحیل شریف میرے ساتھ رہے ہیں٬ میں انہیں ذاتی طور پر جانتا ہوں٬وزیراعظم سینئر ترین جرنیل کو چیف مقرر کرنے کا مشورہ دیا ہے٬وفاقی وزیر سیفران

بدھ 2 نومبر 2016 20:15

اسلام آباد (اُردو پوائنٹ اخبارتازہ ترین - این این آئی۔ 02 نومبر2016ء) وفاقی وزیر سیفران عبدالقادر بلوچ نے کہا ہے کہ جنرل راحیل شریف اپنی مدت ملازمت میں توسیع نہیں لیں گے٬ وہ اپنی ملازمت پوری ہونے پر گھر چلے جائیں گے۔ دوران ملازمت جنرل راحیل شریف میرے ساتھ رہے ہیں٬ میں انہیں ذاتی طور پر جانتا ہوں۔ میں نے وزیراعظم کو مشورہ دیا ہے کہ وہ سینئر ترین جرنیل کو چیف مقرر کر دیں کیونکہ وہ کسی کا نہیں اپنے ادارے کا چیف ہوتا ہے۔

انہوں نے بدھ کو نیشنل پریس کلب اسلام آباد کا دورہ کیا اور پریس کلب کے مختلف شعبہ جات کا دورہ کیا۔ انہوں نے نیشنل پریس کلب کی لائبریری میں خصوصی دلچسپی لی اور اس کی تعریف کی۔ انہوںنے نیشنل پریس کلب کی لائبریری کے لئے کتابوں کا تحفہ بھی دینے کا اعلان کیا۔

(جاری ہے)

ان کے ہمراہ صدر نیشنل پریس کلب شکیل انجم٬ سیکرٹری عمران یعقوب ڈھلوں اور دیگر صحافی بھی تھے۔

انہوں نے کوئٹہ میں پولیس ٹریننگ سنٹر پر دہشت گردی کے واقعہ کا ذکر کرتے ہوئے کہا کہ یہ واقعہ ناقص سیکورٹی کے باعث پیش آیا۔ سانحہ کی تحقیقات کر کے ذمہ داران کو کٹہرے میں لایا جائے۔ وزیراعلیٰ اس واقعہ کے ذمہ دار نہیں۔ پولیس افسران کی ناقص کارکردگی اور سیکورٹی کے انتظامات نہ ہونے کے باعث یہ واقعہ پیش آیا۔ انہوں نے کہا کہ بلوچستان باقی ملک کے مقابلے میں بہت پسماندہ ہے جس کے لئے بہت سے وسائل کی ضرورت ہے۔ عبدالقادر بلوچ نے کہا کہ ریکوڈک اور گوادر پورٹ جیسے منصوبوں سے بلوچستان میں ترقی کا عمل تیز ہو سکتا ہے۔

متعلقہ عنوان :