تحریک انصاف کو اسلام آباد کے ڈیموکریسی پارک میں دھرنے کی اجازت دیدی گئی

اگر ججز کا میڈیا ٹرائل ہی کرنا ہے تو میڈیا والے میرے گھر آجائیں٬ میں نے پاکستان سے ذمہ داری اور آئین سے وفاداری کاحلف اٹھایا ہے٬ میرا کسی کے ساتھ ذاتی تعلق نہیں٬ مجھے نواز شریف سے پیار نہیں اور نا عمران خان سے ہے٬عزت سب کے لیے ہے٬ کیا خان صاحب کے علاوہ پاکستان میں کسی کی عزت نہیں٬ عدالت کو نہ سبزی منڈی بنائیں نہ ڈی چوک ٬ کہا جا رہا ہے کہ اوئے جسٹس شوکت عزیز٬ تمہارے آرڈر کے ساتھ کیا ہورہا ہے٬ کیا عمران خان قانون سے بالاتر ہیں٬حکومت نے تو پریڈ گراؤنڈ کی بھی اجازت نہیں دی یہ توعدالت نے جگہ دی تھی٬ مختص جگہ پر پی ٹی آئی جتنے دن چاہے دھرنا دے سکتی ہے٬ ہم تو اسلام آباد بلاک کرنے کی اجازت نہیں دے سکتے٬ اگرکوئی عدالت یہ اجازت دیتی ہے کہ دارالخلافہ کوبلاک کریں تو کر دیں ْ اسلام آباد ہائی کورٹ کے جسٹس شوکت عزیز صدیقی کے درخواستوں کی سماعت کے دوران ریمارکس

پیر 31 اکتوبر 2016 11:23

اسلام آباد(اُردو پوائنٹ اخبارتازہ ترین - آئی این پی۔ 31 اکتوبر2016ء) اسلام آباد ہائی کورٹ نے پاکستان تحریک انصاف کو ڈیمو کریسی پارک میں دھرنا دینے کی اجازت دیتے ہوئے تمام درخواستیں نمٹا دیں ۔میڈیا رپورٹس کے مطابق اسلام آباد ہائی کورٹ کے فاضل جج جسٹس شوکت عزیز صدیقی نے اسلام آباد لاک ڈاؤن کیس کی سماعت کی٬ سماعت کے دوران جسٹس شوکت عزیز نے تحریک انصاف کے وکلا کو مخاطب کرتے ہوئے کہا کہ میرے بچے ٹی وی دیکھ کرمجھے کچھ نا کچھ بتاتے رہتے ہیں٬ اگر ججز کا میڈیا ٹرائل ہی کرنا ہے تو میڈیا والے میرے گھر آجائیں٬ میں نے پاکستان سے ذمہ داری اور آئین سے وفاداری کاحلف اٹھایا ہے٬ خدا کو حاضر ناظرجان کر کہتا ہوں کہ میرا کسی کے ساتھ ذاتی تعلق نہیں٬ مجھے نواز شریف سے پیار نہیں اور نا عمران خان سے ہے٬عزت سب کے لیے ہے٬ کیا خان صاحب کے علاوہ پاکستان میں کسی کی عزت نہیں٬ عدالت کو نہ سبزی منڈی بنائیں نہ ڈی چوک٬ میرے خاندان کو سب جانتے ہیں۔

(جاری ہے)

٬ کسی نے میرے بارے میں جو بھی کہا٬اللہ جزادیگا۔ کہا جا رہا ہے کہ اوئے جسٹس شوکت عزیز٬ تمہارے آرڈر کے ساتھ کیا ہورہا ہے٬ کیا عمران خان قانون سے بالاتر ہیں۔ جسٹس شوکت عزیز نے ریمارکس دیئے کہ 2015 میں ڈیموکریسی پارک کوسیاسی سرگرمیوں کے لیے مختص کیا تھا٬ حکومت نے تو پریڈ گراؤنڈ کی بھی اجازت نہیں دی یہ توعدالت نے جگہ دی تھی٬ مختص جگہ پر پی ٹی آئی جتنے دن چاہے دھرنا دے سکتی ہے٬ ہم تو اسلام آباد بلاک کرنے کی اجازت نہیں دے سکتے٬ اگرکوئی عدالت یہ اجازت دیتی ہے کہ دارالخلافہ کوبلاک کریں تو کر دیں٬ تحریک انصاف ڈیموکریسی پارک سے دھرنا کرے وہیں سے گھروں کو چلیں جائیں۔

عدالت نے ڈی سی اسلام آباد سے استفسار کیا کہ اسلام آباد انتظامیہ نے دھرنے کے لیے کیا اقدامات کیے٬ کیا اسلام آباد میں کوئی کنٹینر موجود ہے۔ انتظامیہ یقین دہانی کرائے شہریوں کے حقوق متاثر نہیں ہوں گے۔ بعد ازاں اسلام آباد ہائی کورٹ نے شہر کی بندش سے متعلق تمام درخواستیں نمٹا دیں۔