موصل میں داعش کے خلاف آپریشن روکنے کی افواہیں جھوٹی ہیں٬عراقی وزیراعظم

لڑائی بدستور جاری ہے٬موصل میں جاری آپریشن منطقی انجام تک پہنچائیں گے٬حیدرالعبادی

اتوار 30 اکتوبر 2016 11:50

بغداد(اُردو پوائنٹ اخبارتازہ ترین - این این آئی۔ 30 اکتوبر2016ء) عراق کے وزیراعظم حیدر العبادی نے کہا ہے کہ موصل میں دولت اسلامی’داعش‘ کے قبضے کے خلاف جاری فوجی آپریشن روکنے کا سوال ہی پیدا نہیں ہوتا۔ موصل معرکے کو اس کے منطقی انجام تک ہرصورت میں پہنچایا جائے گا۔

(جاری ہے)

غیرملکی خبررساں ادارے کے مطابق موصل جنگ روکے جانے سے متعلق بات کرتے ہوئے عراقی وزیراعظم حیدر العبادی کا کہنا تھا کہ اس قسم کی تمام افواہیں بے بنیاد ہیں کہ موصل میں جنگ روک دی گئی ہے۔

موصل آپریشن کو اس کے منطقی انجام تک پہنچایا جائے گا۔ انہوں نے کہا کہ موصل میں لڑائی بدستور جاری ہے اور عراقی فوج نے داعش کے قبضے سے کئی اہم علاقے خالی کرالیے ہیں۔ جب تک نینویٰ کا سارا علاقہ داعش سے آزاد نہیں ہوجاتا جنگ جاری رہے گی۔