شہداء فاؤنڈیشن آف پاکستان کا تحریک انصاف کے دھرنے میں شرکت نہ کرنے کا فیصلہ

اسلام آباد (اُردو پوائنٹ اخبارتازہ ترین - این این آئی۔ 28 اکتوبر2016ء) شہداء فاؤنڈیشن آف پاکستان نے پاکستان تحریک انصاف کے دھرنے کی حمایت نہ کرنے کا فیصلہ کرتے ہوئے کہا ہے کہ عمران خان کا موجودہ حکومت کے متعلق موقف درست ہے لیکن ان کا طریقہ کار غیرآئینی اور غیرقانونی ہے٬شہداء فاؤنڈیشن صرف ملک میں حکومت کی تبدیلی نہیں چاہتی بلکہ شہداء فاؤنڈیشن کی جدوجہد نظام عدل کے قیام اور اسلام دشمن پالیسیوں کے خلاف ہے٬ملکی مسائل کا حل حکومت کی تبدیلی نہیں بلکہ نظام کی تبدیلی میں ہے ٬عمران خان اور ان کے اتحادی سانحہ ماڈل ٹاؤن کی تو بات کرتے ہیں لیکن شہدائے لال مسجد کے متعلق ایک حرف بھی نہیں بولتے٬کیا لال مسجد میں شہید ہونیوالے پاکستانی نہیں تھے۔

شہداء فاؤنڈیشن کی مرکزی شوریٰ نے ملک بھر میں رکنیت سازی مہم شروع کرنے کا بھی فیصلہ کیا ہے۔

(جاری ہے)

تفصیلات کے مطابق شہداء فاؤنڈیشن کی مرکزی شوریٰ کا اہم اجلاس آج(جمعہ)کو اسلام آباد میں منعقد ہوا٬اجلاس میں تحریک انصاف کے اسلام آباد میں دھرنے کی حمایت کرنے یا نہ کرنے پر غور کیا گیا۔اجلاس میں متفقہ طور پر فیصلہ کیا گیا ہے کہ شہداء فاؤنڈیشن اسلام آباد میں تحریک انصاف کے دھرنے کی حمایت نہیں کرے گی۔

اجلاس کے بعد ترجمان شہداء فاؤنڈیشن حافظ احتشام احمد نے پالیسی بیان میں کہا ہے کہ’’شہداء فاؤنڈیشن موجودہ حکومت کے متعلق عمران خان کے موقف کو درست سمجھتی ہے لیکن ان کا طریقہ کار غیرآئینی و غیرقانونی ہے٬شہداء فاؤنڈیشن کسی بھی غیر شرعی٬غیرآئینی و غیرقانونی عمل کا حصہ نہیں بنے گی٬شہداء فاؤنڈیشن ملک میں فقط حکومت کی تبدیلی نہیں چاہتی بلکہ شہداء فاؤنڈیشن کی جدوجہد ملک میں نظام عدل کے قیام اور اسلام دشمن پالیسیوں کے خلاف ہے٬عمران خان ملکی مسائل کے حل کیلئے صرف حکومت کی تبدیلی چاہتے ہیں جبکہ شہداء فاؤنڈیشن کا موقف ہے کہ ملکی مسائل کے حل کیلئے نظام کی تبدیلی ضروری ہے٬عمران خان ملک میں احتساب اور انصاف کی تو بات کرتے ہیں مگر ان کا اپنا ترز عمل اس کے خلاف ہے٬وہ اور ان کے اتحادی سانحہ ماڈل ٹاؤن کے چودہ شہداء کے خون کا حساب تو مانگتے ہیں مگر شہدائے لال مسجد و جامعہ حفصہ کے متعلق ایک حرف بھی نہیں بولتے٬کیا لال مسجد میں شہید ہونے والے پاکستانی نہیں تھے٬عمران خان جب ماڈل ٹاؤن کے شہداء کی بات کرتے ہیں تو ان کے دائیں بائیں وہ لوگ کھڑے ہوتے ہیں کہ جن کے ہاتھ شہدائے لال مسجد کے خون سے رنگین ہیں٬لہٰذا شہداء فاؤنڈیشن نے فیصلہ کیا ہے کہ تحریک انصاف کے دھرنے کی نہ تو حمایت کی جائیگی اور نہ ہی اس میں شرکت٬شہداء فاؤنڈیشن کی مرکزی شوریٰ نے ملک میں نظام عدل کے قیام اور شہدائے لال مسجد کے ورثا کو انصاف دلانے کیلئے اپنی جدوجہد جاری رکھنے کے عزم کا آعادہ کرتے ہوئے شہداء فاؤنڈیشن کو ملک بھر میں منظم کرنے کا فیصلہ کیا ہے٬اس مقصد کے لئے ملک بھر میں شہداء فاؤنڈیشن کی رکنیت سازی مہم شروع کرنے کا بھی فیصلہ کیا گیا ہے۔