دیوالی کے موقع پر سندھ کے ہندو اکثریتی اضلاع میں لوڈشیڈنگ نہیں ہوگی٬ ڈاکٹر رمیش کمار ونکوانی

کراچی(اُردو پوائنٹ اخبارتازہ ترین - این این آئی۔ 28 اکتوبر2016ء) پاکستان ہندو کونسل کے سرپرست اعلیٰ اور مسلم لیگ (ن) کے ممبر قومی اسمبلی ڈاکٹر رمیش کمار ونکوانی نے وفاقی حکومت کی جانب سے یقین دہانی کروائی ہے کہ دیوالی کے موقع پر سندھ کے ہندو اکثریتی اضلاع بشمول تھرپارکر٬ ٹھٹھہ اور بدین میں لوڈشیڈنگ بالکل نہیں کی ہوگی جبکہ باقی علاقوں میں بھی رعایت دی جائے گی٬ جمعے کے روزمقامی ہندو وفد سے ملاقات کے دوران تبادلہ خیال کرتے ہوئے ڈاکٹر رمیش ونکوانی نے کہا کہ دیوالی کا تہواربلاشبہ اندھیرے پر روشنی کی٬ برائی پر اچھائی کی اور مایوسی پر امید کی فتح کی علامت ہے ۔

(جاری ہے)

انہوں نے کہا کہ موجودہ حکومت بجلی کے بحران پر قابو پانے کیلئے انتھک کوششوں میں مصروفِ عمل ہے اور 2018ء تک ملک سے لوڈشیڈنگ کا مکمل خاتمہ کردیا جائے گا۔ ڈاکٹر رمیش ونکوانی نے ہندوکمیونٹی سے دیوالی کے تہوار پر پاکستان بھر میں امن قائم رہنے اور ملک کی سلامتی کیلئے بھی خصوصی دعاؤں کااہتمام کرنے کی اپیل بھی کی٬ پاکستانی ہندو دیوالی کا تہوار 30اکتوبر بروز اتوار کوبھرپور جوش و خروش سے منائیں گے۔