عمران خان کو پارٹی رہنماؤں کی گرفتاریوں سے پہلے ہی آگاہ کردیا تھا٬ اعتزاز احسن

ہمیں احتجاجی تحریکوں کا بہت تجربہ ہے ٬ہم بھی احتجاج کے دوران خفیہ ٹھکانوں پر چلے جاتے تھے٬مقررہ جگہ اور وقت پر ہی سامنے آتے تھے٬ عمران خان اگر احتساب ریلی کی قیادت خیبرپختونخوا میں کرتے تو موجودہ حالات سے بچ سکتے تھے٬ پی ٹی آئی کی قیادت یہ سمجھ رہی ہے کہ قیادت گرفتار ہوگئی تو کارکن باہر نکل آئیں گے ٬یہ ان کی غلط فہمی ہے کیوں کہ کسی بھی تحریک کی قیادت کیلئے رہنماؤں کا باہر اور کارکنان کے درمیان ہونا بہت ضروری ہے پیپلزپارٹی کے سینئر رہنما اعتزاز احسن کی میڈیا سے گفتگو

جمعہ 28 اکتوبر 2016 12:57

اسلام آباد(اُردو پوائنٹ اخبارتازہ ترین - آئی این پی۔ 28 اکتوبر2016ء) پیپلزپارٹی کے سینئر رہنما اعتزاز احسن نے کہاہے کہ عمران خان کو مشورہ دیا تھا کہ وہ خیبرپختون خوا چلے جائیں اور بعد میں سامنے آئیں کیوں کہ گزشتہ روز پیدا ہونے والے حالات کا پہلے سے علم تھا۔ اسلام آباد میں میڈیا سے گفتگو کرتے ہوئے سینیٹر اعتزاز احسن نے کہاکہ تحریک انصاف کے چئیرمین عمران خان کو مشورہ دیا تھا کہ وہ خیبرپختونخوا جاکر رپوش ہوجائیں وہاں انہیں کوئی بھی گرفتار نہیں کرے گا اور مناسب وقت پر ایک بڑے جلوس کے ہمراہ منظر عام پر آئیں کیوں کہ گزشتہ روز پیدا ہونے والے حالات پہلے سے علم تھا ان حالات کی پیش گوئی پہلے ہی کردی تھی۔

اعتزاز احسن کا کہنا تھا ہمیں احتجاجی تحریکوں کا بہت تجربہ ہے ہم بھی احتجاج کے دوران خفیہ ٹھکانوں پر چلے جاتے تھے اور مقررہ جگہ اور وقت پر ہی سامنے آتے تھے۔

(جاری ہے)

رہنما پیپلزپارٹی نے کہا کہ عمران خان اگر احتساب ریلی کی قیادت خیبرپختونخوا میں کرتے تو موجودہ حالات سے بچ سکتے تھے لیکن پی ٹی آئی کی قیادت یہ سمجھ رہی ہے کہ قیادت گرفتار ہوگئی تو کارکن باہر نکل آئیں گے یہ ان کی غلط فہمی ہے کیوں کہ کسی بھی تحریک کی قیادت کیلئے رہنماؤں کا باہر اور کارکنان کے درمیان ہونا بہت ضروری ہے۔ پی ٹی آئی کو ایم آر ڈی تحریک سے سبق حاصل کرنا چاہئے۔