حکومت طاقت کے ذریعہ سیاسی معاملات حل نہیں کر سکتی٬ دہشت گردانہ طریقے سے سیاسی پرامن احتجاج کو نہ روکا جائے٬ قمر زمان کائرہ

کراچی (اُردو پوائنٹ اخبارتازہ ترین - این این آئی۔ 27 اکتوبر2016ء) پاکستان پیپلز پارٹی کے مرکزی سیکرٹری اطلاعات قمر زمان کائرہ نے کہا ہے کہ حکومت طاقت کے ذریعہ سیاسی معاملات حل نہیں کر سکتی ] دہشت گردانہ طریقے سے سیاسی پرامن احتجاج کو نہ روکا جائے ۔ ورنہ حالات حکومت کے کنٹرول سے باہر ہو جائیں گے اور اس کے بعد جو مسائل اور واقعات رونما ہوں گے ٬ اس کی ذمہ دار حکومت خود ہو گی ۔

حکومت گلو بٹوں کے ذریعہ خوف زدہ کرنے کا عمل بند کرے ۔ تحریک انصاف کے گرفتار کارکنوں کو فوری رہا کیا جائے ۔ پاناما پیپرز میں شامل تمام افراد کا احتساب کیا جائے ۔ سیاسی مسائل کے حل کے لیے ضروری ہے کہ حکومت پیپلز پارٹی کا پاناما انکوائری بل فوری طور پر پارلیمنٹ سے منظور کرے ۔ حکومت نے 2 نومبر سے پہلے 2 نومبر والے حالات خود پیدا کر دیئے ہیں ۔

(جاری ہے)

حکومت کو چاہئے کہ وہ طاقت کے بجائے مذاکرات کا راستہ اختیار کرے ۔ ان خیالات کا اظہار انہوں نے جمعرات کو پیپلز پارٹی میڈیا سیل سندھ میں پریس کانفرنس سے خطاب کرتے ہوئے کیا ۔ اس موقع پر پیپلز پارٹی سندھ کے صدر نثار احمد کھوڑو ٬ سعید غنی اور دیگر رہنما بھی موجود تھے ۔ قمر الزمان کائرہ نے کہا کہ پیپلز پارٹی ملک میں جمہوریت کی بالا دستی چاہتی ہے ۔

جمہوری نظام کی بالادستی کے لیے جب ہم نے حکومت سے بات کی تو ہمیں طعنے دیئے گئے اور عمران خان نے بھی ہم پر الزامات لگائے ۔ انہوں نے کہا کہ پیپلز پارٹی کی پالیسی ہے کہ پرامن احتجاج تمام سیاسی جماعتوں کا حق ہے ۔ ہم بھی پرامن احتجاج پر یقین رکھتے ہیں ۔ ہم تحریک انصاف کی اسلام آباد بند کرنے کی لاک ڈاؤن پالیسی سے متفق نہیں ہیں ۔ ہم نے عمران خان کو مشورہ دیا تھا کہ وہ احتجاج کے اس طریقے سے گریز کریں اور مطالبات کے حل کے لیے پر امن احتجاج کا راستہ اختیار کیا جائے ۔

انہوں نے کہا کہ ہم نے حکومت کو بھی مشورہ دیا تھا کہ سیاسی مسائل کا حل مذاکرات سے نکالا جائے ۔ انہوں نے کہا کہ اس وقت ملک میں جو سیاسی افراد تفری پھیلی ہوئی ہے ٬ اس کی ذمہ دار حکومت ہے ۔ حکومت کو چاہئے تھا کہ وہ پیپلز پارٹی پاناما انکوائری بل پارلیمنٹ سے فوری منظور کرے ۔ انہوں نے کہا کہ پاناما پیپرز کرپشن کا ایک بڑا اسکینڈل ہے ۔ پیپلز پارٹی چاہتی ہے کہ پاناما پیپرز میں جن کے نام آئے ہیں ٬ ان کا احتساب ہونا چاہئے انہوں نے کہا کہ حکومت نے پی ٹی آئی کے خلاف کریک ڈاؤن شروع کرکے غیر جمہوری راستہ اپنایا ہے ۔

طاقت کے ذریعہ مسائل حل نہیں ہو سکتے اور نہ ہی طاقت کے ذریعہ سیاسی معاملات کو دبایا جا سکتا ہے ۔ جب تحریکیں شروع ہو جاتی ہیں تو تو ان وہ منزل حاصل کر لیتی ہیں ۔ پی ٹی آئی اسلام آباد میں پر امن یوتھ کنونشن منعقد کر رہی تھی ۔ حکومت نے پولیس کے ذریعہ پی ٹی آئی کے کارکنوں کی گرفتاری کرکے خود سیاسی معاملات خراب کر دیئے ہیں ۔ 2 نومبر سے پہلے حکومت نے خود 2 نومبر والے حالات پیدا کر دیئے ہیں ۔

پی ٹی آئی کے بجائے حکومت نے خود ہی اسلام آباد بند کرنا شروع کر دیا ہے ۔ حکومت دہشت گردانہ اقدامات سے گریز کرے ۔ سیاسی معاملات کو مذاکرات کے ذریعہ حل کیا جائے ۔ حکومت گلو بٹوں اور الو بٹوں کے ذریعہ اپوزیشن کے پر امن احتجاج کو نہیں روک سکتی اور نہ ہی اپوزیشن کو خوف زدہ کر سکتی ہے ۔ انہوں نے کہا کہ پیپلز پارٹی حکومت کو اور تحریک انصاف کو مشورہ دیتی ہے کہ وہ تصادم کے بجائے مسائل بات چیت کے ذریعہ حل کریں ۔

انہوں نے کہا کہ اگر ملک میں جمہوری نظام کو خطرہ لاحق ہوا تو پیپلز پارٹی عوام کی طاقت کے ذریعہ جمہوری نظام کی حفاظت کرے گی ۔ قمر الزمان کائرہ نے کہا کہ ملک میں سیاسی حالات اس وقت بہتر ہو سکتے ہیں ٬ جب مسلم لیگ (ن) کی حکومت بلاول بھٹو زرداری کے چار مطالبات کو تسلیم کر لے گی ۔ قمر زمان کائرہ نے مطالبہ کیا کہ حکومت تحریک انصاف کے خلاف کریک ڈاؤن فوری بند کرے اور تمام گرفتار کارکنوں کو رہا کیا جائے ۔

نثار احمد کھوڑو نے کہا کہ حکمران لیگ صبر کا مظاہرہ کرے ۔ تحریک انصاف پر طاقت کے استعمال کو بند کرے ورنہ حکمران لیگ کی کرسی ان کی پالیسیوں کی وجہ سے خطرے میں پڑ سکتی ہے ۔ اس موقع پر سعید غنی نے کہا کہ حکومت اور تحریک انصاف کو چاہئے کہ وہ انتشار اور محاذ آرائی کی سیاست سے گریز کرے ۔ انہوں نے کہا کہ پیپلز پارٹی کسی دھرنے میں شریک نہیں ہو گی ۔ ہم چاہتے ہیں کہ سیاسی مسائل پارلیمنٹ اور مذاکرات کے ذریعہ حل ہوں ۔