عمران خان نے پردہ نشین امپائر کے اشارے پر جتنے دن دھرنے میں گزارے اتنے دن کے پی کے میں بھی نہیں آئے ٬ سینیٹر روبینہ خالد

کے پی کے میں پی ٹی آئی کے کارکن اپنے وزراء ٬مشیروں کی کرپشن کیخلاف فریاد کررہے ہیں٬ ٬ بیان

بدھ 26 اکتوبر 2016 21:19

اسلام آباد(اُردو پوائنٹ اخبارتازہ ترین - این این آئی۔ 26 اکتوبر2016ء) پاکستان پیپلزپارٹی کی سینیٹر روبینہ خالد نے کہا ہے کہ عمران خان نے پردہ نشین امپائر کے اشارے پر جتنے دن دھرنے میں گزارے اتنے دن کے پی کے میں بھی نہیں آئے آج حالت یہ ہے کہ کے پی کے میں پی ٹی آئی کے کارکن اپنے وزراء اور مشیروں کی کرپشن کے خلاف فریاد کررہے ہیں۔ عمران خان اپنے کارکنوں کی فریاد سننے سے بھی انکار کر رہے ہیں۔

انہوں نے کہا کہ کے پی کے کے عوام نااہل حکومت کو بھگت رہے ہیں۔

(جاری ہے)

پشاور کھنڈرات بن رہا ہے جبکہ کوہستان کے عوام کو بنیادی حقوق سے محروم رکھا جا رہا ہے۔ سابق حکومت کے دوران کوہستان میں ضلع ہسپتال کا کام شروع ہوا مگر پی ٹی آئی کی حکومت نے اس ہسپتال کے فنڈ روک دئیے جو کوہستان کے عوام کے ساتھ سراسر ناانصافی ہے۔ سینیٹر روبینہ خالد نے کہا کہ کوہستان کے عوام کو تعلیم کے حق سے بھی محروم رکھا جا رہا ہے۔

انہوں نے کہا کہ کے پی کے کے کسانوں سے ڈرائی فوڈ پر فی من 40روپے جگا ٹیکس لیا جا رہا ہے اور گلگت بلتستان سے آنے والوں کی بھی جیب کاٹی جارہی ہے جو سرسار ناانصافی ہے۔ انہوں نے کہا کہ گلگت بلتستان کے عوام کو ملک کے دیگر حصوں میں جانے کے لئے کے پی کے کا راستہ اختیار کرنا پڑتا ہے۔