عمران خان نے پردہ نشین امپائر کے اشارے پر جتنے دن دھرنے میں گزارے اتنے دن کے پی کے میں بھی نہیں آئے

پی کے میں پی ٹی آئی کے کارکن اپنے وزراء اور مشیروں کی کرپشن کے خلاف فریاد کررہے ہیں٬ پیپلزپارٹی کی رہنما سینیٹر روبینہ خالد کابیان

بدھ 26 اکتوبر 2016 20:43

اسلام آباد(اُردو پوائنٹ اخبارتازہ ترین - آئی این پی۔ 26 اکتوبر2016ء) پاکستان پیپلزپارٹی کی رہنما سینیٹر روبینہ خالد نے کہا ہے کہ عمران خان نے پردہ نشین امپائر کے اشارے پر جتنے دن دھرنے میں گزارے اتنے دن کے پی کے میں بھی نہیں آئے٬ آج حالت یہ ہے کہ کے پی کے میں پی ٹی آئی کے کارکن اپنے وزراء اور مشیروں کی کرپشن کے خلاف فریاد کررہے ہیں٬ عمران خان اپنے کارکنوں کی فریاد سننے سے بھی انکار کر رہے ہیں۔

بدھ کو اپنے ایک بیان میں انہوں نے کہا کہ کے پی کے کے عوام نااہل حکومت کو بھگت رہے ہیں۔ پشاور کھنڈرات بن رہا ہے جبکہ کوہستان کے عوام کو بنیادی حقوق سے محروم رکھا جا رہا ہے۔ سابق حکومت کے دوران کوہستان میں ضلع ہسپتال کا کام شروع ہوا مگر پی ٹی آئی کی حکومت نے اس ہسپتال کے فنڈ روک دئیے جو کوہستان کے عوام کے ساتھ سراسر ناانصافی ہے۔

(جاری ہے)

سینیٹر روبینہ خالد نے کہا کہ کوہستان کے عوام کو تعلیم کے حق سے بھی محروم رکھا جا رہا ہے۔

انہوں نے کہا کہ کے پی کے کے کسانوں سے ڈرائی فوڈ پر فی من 40روپے جگا ٹیکس لیا جا رہا ہے اور گلگت بلتستان سے آنے والوں کی بھی جیب کاٹی جارہی ہے جو سرسار ناانصافی ہے۔ انہوں نے کہا کہ گلگت بلتستان کے عوام کو ملک کے دیگر حصوں میں جانے کے لئے کے پی کے کا راستہ اختیار کرنا پڑتا ہے۔