عمران خان کو نا اہل قرار دینے اور اسلام آباد دھرنا روکنے کیلئے لاہور ہائیکورٹ میں درخواست دائر

بدھ 26 اکتوبر 2016 18:35

لاہور۔26 اکتوبر(اُردو پوائنٹ اخبارتازہ ترین - اے پی پی۔ 26 اکتوبر2016ء) تحریک انصاف کے چیئرمین عمران خان کی اہلیت کو لاہور ہائیکورٹ میں چیلنج کرتے ہوئے استدعا کی گئی ہے کہ عمران خان کو نااہل قرار دیا جائے اور اسلام آباد دھرنا روکنے کا حکم دیا جائے۔

(جاری ہے)

آئینی درخواست افتخار چودھری ایڈووکیٹ نے دائر کی ہے جس میں کہا گیا ہے کہ تحریک انصاف کے چیئرمین عمران خان اور ان کے ساتھی ملک میں انتشار پھیلا رہے ہیں٬ تحریک انصاف احتجاج سے متعلق آئینی آرٹیکلز کا غلط استعمال کر رہی ہے٬ تحریک انصاف کے دھرنوں کی وجہ سے ملک میں بہیودگی پھیل رہی ہے جو اسلامی قوانین کی خلاف ورزی ہے٬ تحریک انصاف کے دھرنوں میں خواتین کے بیہودگی کے واقعات ریکارڈ پر ہیں٬ درخواست میں مزید کہا گیا ہے کہ آئین کی آڑ میں عمران خان ملک کو عدم استحکام سے دوچار کر رہے ہیں٬ عمران خان اور انکے ساتھیوں کے اقدامات آئین کے آرٹیکل چھ کے تحت غداری کے زمرے میں آتے ہیں۔

درخواست میں استدعا کی گئی ہے کہ عمران خان کو آئین کے آرٹیکل تریسٹھ کے تحت نااہل قرار دیا جائے اور تحریک انصاف کو دو نومبر کا دھرنا روکنے کا حکم دیا جائے۔