عمران خان کے ہاتھ میں وزیراعظم کی لکیر نہیں ہے٬ منظور وسان

ایم کیوایم لندن کتنا بھی زور مارلے ان کا کوئی مستقبل نہیں٬ مستقبل صرف ایم کیوایم پاکستان کا ہے وزیر صنعت سندھ منظور وسان کی میڈیا سے گفتگو

بدھ 26 اکتوبر 2016 15:04

کراچی(اُردو پوائنٹ اخبارتازہ ترین - آئی این پی۔ 26 اکتوبر2016ء) وزیر صنعت سندھ منظور وسان نے کہاہے کہ آئندہ انتخابات 2018 میں ہوں گے اور مسلم لیگ (ن)٬ پیپلزپارٹی اور تحریک انصاف کو مینڈیٹ ملے گا لیکن عمران خان کے ہاتھ میں وزیراعظم کی لکیر نہیں ہے۔

(جاری ہے)

کراچی میں میڈیا سے بات کرتے ہوئے منظور وسان نے کہا کہ ملک میں حکومتیں اکتوبر اور نومبر میں گرتی ہیں لیکن اس بار جمہوریت کو خطرات نہیں ہیں٬نومبر کے مہینے میں سیاسی اور غیر سیاسی اہم عہدوں پر تبدلیاں ہوں گی٬ آئندہ انتخابات 2018 میں ہوں گے اوراس میں مسلم لیگ (ن)٬ پیپلزپارٹی اور تحریک انصاف کو مینڈیٹ ملے گا لیکن عمران خان کے ہاتھ میں وزیراعظم کی لکیر نہیں ہے۔

ایم کیوایم لندن کتنا بھی زور مارلے ان کا کوئی مستقبل نہیں٬ مستقبل صرف ایم کیوایم پاکستان کا ہے۔ صوبائی وزیر کا کہنا تھا کہ طاہرالقادری اسلام آباد میں تحریک انصاف کے دھرنے میں شرکت کریں گے اور اس کا مقصد بڑی گڑبڑ ہے٬ ان کا اسلام آباد دھرنے میں شامل ہونا کسی اشارے کا نتیجہ ہے۔ سانحہ کارساز کی تحقیقات سے متعلق انہوں نے کہا کہ سانحہ کارساز کی تحقیقات میں اس وقت کے وزیراعلی اور میئر کراچی کو شامل تفتیش کیا جائے کیونکہ دونوں اہم شخصیات کو شاملِ تفتیش کئے بغیر تحقیقات شفاف ہونا ممکن نہیں۔