تحریک انصاف کے لاک ڈاؤن اسلام آباد میں عوا می تحریک کی شمولیت خوش آئند ہے ‘عبدالعلیم خان

حکومتی کشتی میں سوراخ ہو چکے٬ڈوبتا ہوا ٹائی ٹینک حکمرانوں کو مزید سرپرائز دے گا ‘کارکنوں سے گفتگو

منگل 25 اکتوبر 2016 19:04

لاہور(اُردو پوائنٹ اخبارتازہ ترین - این این آئی۔ 25 اکتوبر2016ء) تحریک انصاف سنٹرل پنجاب کے صدر عبدالعلیم خان نے کہا ہے کہ تحریک انصاف کے لاک ڈاؤن اسلام آباد میں عوامی تحریک کی شمولیت خوش آئند امر ہے انشاء اللہ 2نومبر سے پہلے مزید سیاسی جماعتیں بھی عمران خان کا ساتھ دیں گی ٬حکومتی کشتی میں کئی ایک سوراخ ہو چکے ہیں اور حکومت کا ڈوبتا ہوا ٹائی ٹینک حکمرانوں کو مزید سرپرائز دے گا ۔

عبدالعلیم خان نے پارٹی کارکنوں سے گفتگو کرتے ہوئے کہا کہ قومی حالات سخت ترین سیاسی بحران کی نشاندہی کر رہے ہیں خود حکومتی صفوں میں بے چینی پائی جاتی ہے اور غیر جانبدار مبصرین اور میڈیا اس تمام تر صورتحال کا ذمہ دار وزیر اعظم کو قرار دے رہا ہے لیکن حکمران کمال ڈھٹائی کا مظاہرہ کرتے ہوئے جان بوجھ کر آنکھیں بند کیے بیٹھیں ہیں ۔

(جاری ہے)

عبدالعلیم خان نے کہا کہ میاں نواز شریف کو قوم کو سچ بتانا چاہیے کہ وہ کیوں پاناما لیکس کے معاملے پر اپوزیشن کے ٹی اوآرز نہیں مان رہے انہوں نے کہا کہ عمران خان نے حکمرانوں کو بہت مہلت دی لیکن دل میں چورہونے کے باعث مثبت جواب نہیں دیا گیا اور اب نوبت 2نومبر کے لاک ڈاؤن اسلام آباد کی طرف بڑھ رہی ہے اور اب بھی موقع ہے نواز شریف استعفے یا تلاشی میں سے ایک آپشن اختیار کر لیں عبدالعلیم خان نے کہا کہ تحریک انصاف ابھی نہیں تو کبھی نہیں کی بنیاد پرباہر نکل رہی ہے اور پی ٹی آئی کا کارکن 2نومبر کو اسلام آباد پہنچے گا ۔

دریں اثناء عبدالعلیم خان کی ہدایت پر لاہور سے ممبر صوبائی اسمبلی شعیب صدیقی کی سربراہی میں تحریک انصاف کی خصوصی ٹیم اسلام آباد کیلئے روانہ ہو گئی جس میں سابق وزیر ڈاکٹر سہیل ظفر چیمہ ٬ پی ٹی آئی کے رہنما جمشید اقبال چیمہ ٬میاں یامین ٹیپو ٬ مسرت جمشید٬ فرخ جاوید مون ٬ شوکت بھٹی اور نذیر چوہان ان کے ہمرا ہ ہیں ۔