ْ اسلام آباد ۔ (اُردو پوائنٹ اخبارتازہ ترین - اے پی پی۔ 24 اکتوبر2016ء) محکمہ صحت اسلام آباد نے دیہی علاقوں میں
ڈینگی کی خصوصی مہم میں 6 دن کی توسیع کردی ہے اب
ڈینگی کے خلاف خصوصی مہم 5نومبر تک جاری رہے گی‘ وفاقی دارالحکومت اسلام آباد میں موسم تبدیل ہونے کی وجہ سے
ڈینگی کے متاثرہ مریضوں میں واضح کمی ہوئی ہے۔ گذشتہ پانچ سال کے اعداد و شمار کے مطابق نومبر کے پہلے ہفتہ میں
ڈینگی کے مچھر غائب ہو جاتے ہیں اس وقت شہریوں کیلئے بہت ضروری ہے کہ وہ اپنے گھروں میں مچھر مار سپرے کریں کیونکہ مچھر کمروں میں ٹھکانہ بنا لیتے ہیں۔
رواں سال 7 اگست سے لے کر اب تک وفاقی دارلحکومت اسلام آباد میں تقریبا950 مریضوں میں
ڈینگی کا وائرس پایا گیا ہے٬ سارے مریض مقامی ہسپتالوں میں علاج معالجہ کے بعد صحت یاب ہو کر اپنے گھروں کو چلے گئے ہیں۔
(جاری ہے)
اسسٹنٹ ڈسٹرکٹ ہیلتھ آفیسر اور ماہر وبائی امراض ڈاکٹر نجیب درانی نی پیرکو ’’اے پی پی‘‘ کو بتایا کہ محکمہ صحت اسلام آباد کے زیر اہتمام دیہی علاقوں مین ڈینگی کے خلاف خصوصی مہم جاری ہے پہلے خصوصی مہم 30 اکتوبر کو اختتام پزیر ہونا تھی تاہم محکمہ صحت اسلام آباد نے دیہی علاقوں میں ڈینگی کی خصوصی مہم میں 6 دن کی توسیع کردی ہے اب ڈینگی کے خلاف خصوصی مہم 5نومبر تک جاری رہے گی۔
انہوں نے کہا کہ رواں
ڈینگی سیزن میں اسلام آباد میں دیہی علاقوں بالخصوص روات٬ ترلائی٬ سوہان اور بہارہ کہو زیادہ متاثر ہوئے جس میں سب سے زیادہ
ڈینگی سے متاثرہ مریض ہسپتالوں میں رپورٹ ہوئے ہیں۔ رواں سیزن کے دوران اسلام آباد کے دیہی علاقوں میں 815 جبکہ اسلام آباد کے شہری علاقوں میں 135
ڈینگی کے مریضوں میں وائرس پایا گیا جس کا علاج بے نظیر ہسپتال اور ہولی فیملی ہسپتال میں کیا گیا اور تمام مریض علاج معالجہ کے بعد صحت یاب ہو کر ڈسچارج ہو گئے۔
انہوں نے کہا کہ خصوصی مہم کے دوران ملیریا انسپکٹر٬ سپروائزر اور دیگر عملہ گھروں کے باہرخدمات سرانجام دے رہا ہے جبکہ لیڈی ہیلتھ ورکرز گھروں کے اندر
ڈینگی لاروا کی آفزائش کی جگہوں کو تلف کر رہی ہیں۔
ڈاکٹر نجیب درانی نے کہا کہ موسم کی تبدیلی اسلام آباد اور راولپنڈی کے شہریوں کیلئے خوش آئند ہے کیونکہ پہلے روزانہ 70 تا 100 افراد ہسپتالوں میں رپورٹ ہوتے تھے تاہم موسم کی تبدیلی کی وجہ سے اب مریضوں کی تعداد بہت کم ہو چکی ہے۔
انہوں نے کہا کہ محکمہ صحت اسلام آباد کے گذشتہ پانچ سال کے ڈیٹا کے مطابق
ڈینگی کا دورانیہ 12 نومبر تک ہوتا ہے اس کے بعد مچھر ختم ہو جاتا ہے کیونکہ وہ کسی کو کاٹ نہیں سکتا۔ انہوں نے شہریوں کو خبردار کیا کہ وہ گھروں کے اندر مچھر مار سپرے کریں کیونکہ یہ موسم
ڈینگی کیلئے خطرناک ہے کیونکہ مچھر ٹھنڈی جگہوں کی بجائے گرم مقامات پر ٹھکانہ بنا لیتا ہے۔
