ملک کی ترقی و خو شحالی کے لئے نوجوان نسل کو معیاری تعلیم سے آراستہ کرنا ہو گا ‘رانا مشہود احمد

لاہور (اُردو پوائنٹ اخبارتازہ ترین - این این آئی۔ 24 اکتوبر2016ء) وزیر تعلیم پنجاب رانا مشہود احمد خاں نے کہا ہے کہ ملک کی ترقی خوشحالی کے لئے نوجوان نسل کو معیاری تعلیم سے آراستہ کرنا ہو گا۔ نوجوان پاکستان کا روشن مستقبل ہیں٬ وزیر اعلیٰ پنجاب کے وژن کے مطابق پنجاب حکومت نوجوانوں کو زیور تعلیم سے آراستہ کرنے کے لئے انقلابی اقدامات پر عمل پیرا ہے۔

صوبائی وزیر تعلیم رانا مشہود احمد خاں نے پاکستان مسلم لیگ (ن) کے اراکین اسمبلی و کارکنوں سے ملاقات کے دوران گفتگو کرتے ہوئے کہا کہ نوجوانوںکی شکل میں روشن اور مستحکم پاکستان دیکھ رہا ہوں۔ پنجاب حکومت وزیر اعلیٰ محمد شہباز شریف کی قیادت میں صوبہ بھر میں فروغ تعلیم اورجہالت کے خاتمے کو یقینی بنانے کے لئے بھر پور ٬ٹھوس اور مثالی اقدامات کر رہی ہے ۔

(جاری ہے)

صوبہ میں تعلیم کے بجٹ میں خاطر خواہ اضافہ کیا گیا ہے ۔ہر سال ہزاروں اساتذہ کی میرٹ پر تقرری ٬اساتذہ کا تربیتی پروگرام٬ سکولوں و کالجوں کی تعداد میں اضافہ ٬سائنس و کمپیو ٹر لیبارٹریوں کا قیام ٬نمایاں کارکردگی کے حامل اساتذہ اور طلباء وطالبات میں لیپ ٹاپ کی تقسیم٬غیر ملکی مطالعاتی دورے اور ٹاپ پوزیشنز حاصل کرنے والے سٹوڈنٹس کو گارڈ آف آنر پنجا ب حکومت کا تعلیم کے شعبہ میں سنجیدہ کاوشوں کا منہ بولتا ثبوت ہے۔

صوبائی وزیر نے مزید کہا کہ پنجاب حکومت تعلیم کے شعبہ میں بہتری کیلئے ترجیحی بنیادوں پر کام کررہی ہے ۔ انہوں نے کہا کہ نوجوان ہمارا قیمتی سرمایہ ہیں٬ نوجوان ملک و قوم کی ترقی و خوشحالی میں اہم کردار ادا کررہے ہیں۔ ا ن کا کہنا تھا کہ محنت ٬ لگن اور معیاری تعلیم حاصل کر کہ ہی معاشرے میں با وقار مقام حاصل کیا جا سکتا ہے۔