اسلام آباد ۔ (اُردو پوائنٹ اخبارتازہ ترین - اے پی پی۔ 24 اکتوبر2016ء) وفاقی وزیر مذہبی امور سردار محمد یوسف نے پرائیویٹ
حج گروپ آرگنائزرز سے کہا ہے کہ سرکاری سکیم کی طرح وہ بھی
حج پیکج کو کم کریں۔ وفاقی کابینہ نے
حج اور عمرہ ایکٹ کی منظوری دیدی ہے جسے جلد ہی اسمبلی سے منظور کرایا جائے گا۔ عمرہ کے ذریعے ذاتی مفاد حاصل کرنے والوں کا محاسبہ کیا جائے گا۔
سرکاری سکیم ہو یا پرائیویٹ سکیم اللہ کے مہمانوں کی خدمت کا جذبہ ہونا چاہئے کیونکہ عبادت سے جنت اور خدمت سے ’’اللہ‘‘ ملتا ہے۔ وہ پیر کو یہاں
حج گروپ آرگنائزر ایسوسی ایشن آف پاکستان (ہوپ) کے نومنتخب عہدیداروں کی تقریب حلف برادری سے خطاب کررہے تھے۔ وزیر مذہبی امور نے
حج 2016ء کی شاندار کامیابی پر ایچ جی اوز کو مبارکباد پیش کی اور کہا کہ وزیراعظم محمد نوازشریف نے انہیں جب وزارت کی ذمہ داری سونپی تھی تو یہ ان کے لئے ایک بڑا چیلنج تھا کیونکہ اس سے قبل کے حالات سے سب بخوبی آگاہ ہیں۔
(جاری ہے)
2013ء‘ 2014‘ اور 2015ء کے
حج آپریشنز میں عوام نے سرکاری سکیم کو زبردست پذیرائی بخشی۔
حج 2016ء کے لئے دو لاکھ 80 ہزار درخواستوں کا جمع ہونا اس بات کا واضح ثبوت ہے۔ سرکاری سکیم ہو یا پرائیویٹ ہمارا مقصد حاجیوں کی خدمت ہونا چاہئے۔ پرائیویٹ سیکٹر کو بھی
حج انتظامات کے حوالے سے ہم نے مشاورت میں شامل رکھا ہے۔ سب کی مشترکہ کوششوں سے
حج آپریشن کامیابی سے ہمکنار ہوا ہے۔
انہوں نے کہا کہ
حج آپریشن حکومت اور پاکستان کے لئے نیک نامی کا باعث بنا ہے۔ لوگ وزیراعظم اورانہیں مبارکباد کے خطوط ارسال کررہے ہیں عوامی سطح پر
حج آپریشن کو زبردست پذیرائی حاصل ہوئی ہے انہوں نے
حج آپریشن میں ذرائع ابلاغ کے کردار کو خاص طور پر سراہا۔ وزیر مذہبی امور نے کہا کہ
حج اور عمرہ عبادت ہے سرکاری فرائض اپنی جگہ ہم یہ فریضہ عبادت سمجھ کر ادا کرتے ہیں۔
عمل کا دارو مدار نیت پر ہے۔ پرائیویٹ ٹوور آپریٹرز بھی یہ فریضہ عبادت سمجھ کر کریں اور ان کا مقصد حاجیوں کی خدمت ہونا چاہئے عبادت سے جنت ملتی ہے جبکہ خدمت سے ’’اللہ‘‘ ملتا ہے۔ انہوں نے کہا کہ
حج اور عمرہ کے حوالے سے ایکٹ کی وفاقی کابینہ نے منظوری دیدی ہے۔ جسے جلد اسمبلی سے منظور کرایا جائے گا۔ عمرہ کے معاملات کو سب کی مشاورت سے زائرین کے لئے آسان بنایا جائے گا اور عمرہ کے ذریعے ذاتی مفاد حاصل کرنے والوں کا محاسبہ کیا جائے گا۔
انہوں نے ہوپ کے نو منتخب عہدیداروں کو مبارکباد پیش کی اور ان سے توقع ظاہر کی ہے کہ وہ آئندہ بھی
حج امو رکو بہترین بنانے میں اپنا کردار ادا کریں گے انہوں نے
حج ٹوور آپریٹرز سے کہا کہ وہ بھی سرکاری سکیم کی طرح پرائیویٹ
حج پیکج کو کم سے کم سطح تک لانے کی کوشش کریں ۔ وزیر مذہبی امور نے ’’ہوپ‘‘ کے نومنتخب عہدایداروں سے حلف لیا۔ ’’ہوپ‘‘ کی جانب سے وزیر مذہبی امور سردار محمد یوسف کو
حج 2016ء کے کامیاب آپریشن پر مبارکباد پیش کی گئی اور انہیں یادگاری شیلڈ بھی دی گئی۔
تقریب میں وفاقی سیکرٹری مذہبی امور سہیل عامر اور جوائنٹ سیکرٹری محمد فاروق نے بھی شرکت کی۔ قبل ازیں ہوپ کے چیئرمین ندیم شریف نے خطبہ استقبالیہ پیش کیا اور کامیاب
حج آپریشن پر وزیر مذہبی امور اور وزارت مذہبی امور کی کاوشوں کی خاص طور پر تعریف کی۔
