چینی صدر برکس سربراہی کانفرنس میں شرکت کیلئے بھارتی ریاست گوا پہنچ گئے

گوا (اُردو پوائنٹ اخبارتازہ ترین - آئی این پی۔ 15 اکتوبر2016ء) چین کے صدر شی جن پنگ برکس کے ابھرتے ہوئے مارکیٹ بلاک برکس جس میں برازیل ٬ روس ٬ بھارت ٬ چین اور جنوبی افریقہ شامل ہیں سربراہی اجلاس میں شرکت کیلئے ہفتے کو مغربی بھارتی ریاست گو ا پہنچ گئے ٬ توقع ہے کہ پانچوں رکن ممالک کے رہنماء 15اور 16اکتوبر کو ہونیوالی سربراہی کانفرنس میں برکس تعاون اور باہمی دلچسپی کے دیگر امور پر تبادلہ خیال کریں گے ٬ سربراہی کانفرنس کے اختتام پر اتوار کو گوا ڈیکلریشن جاری کیا جائے گا ٬ چینی صدر شی برازیل کے صدر مچل ٹیمر ٬ روسی صدر ولادی میر پیوٹن ٬ بھارتی وزیر اعظم نریندرا مودی ٬ اور جنوبی افریقہ کے صدر جیٹو زوما کے ہمراہ کانفرنس میں شرکت کریں گے ٬ یہ اس نوعیت کی آٹھویں کانفرنس ہو گی ٬ پانچوں رہنما برکس بزنس کونسل کے نمائندوں اور بم سٹک (باہمی سیکٹورل ٹیکنیکل و اقتصادی تعاون کیلئے خلیج بنگال منصوبے ) کے رکن ممالک کے مملکتی رہنمائوں کے ساتھ ڈائیلاگ کریں گے ٬بم سٹک جو جنوبی ایشیاء اور جنوب مشرقی ایشیائی ممالک کو ملانے کے لئے شامل کیا گیا ہے بنگلہ دیش ٬ بھوٹان ٬ بھارت ٬ میانمر ٬ نیپال ٬ سری لنکا اور تھائی لینڈ پر مشتمل ہے ٬ صدر شی سربراہی کانفرنس کے موقع پر دوسرے ممالک کے رہنمائوں کے ساتھ بھی د و طرفہ مذاکرات کریں گے ۔