محرم الحرام کا مہینہ ہمیں باطل قوتوں کا مقابلہ کرنے کا درس دیتا ہے ٬صوبائی وزیر تعلیم

منگل 11 اکتوبر 2016 18:10

لاہور۔11 اکتوبر(اُردو پوائنٹ اخبارتازہ ترین - اے پی پی۔ 11 اکتوبر2016ء) صوبائی وزیر تعلیم رانا مشہود احمد خاں نے کہا ہے کہ یوم ِ عاشور ہمیں شہدائے کربلا کی عظیم قربانیوں کی یاد دلاتا ہیِ٬شہدائے کربلا کی قربانیاں ہمارے لئے مشعل راہ ہیں٬نواسہ رسول ؐ حضرت امام حسین ؓ اور ان کے جانثار ساتھیوں نے عظیم مقصد کیلئے اپنی جانوں کی قربانی دے کر تاریخ اسلام کا درخشاں باب رقم کیا ہے۔

(جاری ہے)

یومِ عاشور پر اپنے پیغام میں انہوں نے کہا کہ واقعہ کربلا صبر و تحمل٬ رواداری٬ ایثار اور قربانی کا درس دیتا ہے جس پر عمل پیرا ہوکر پرامن معاشرہ تشکیل دیا جا سکتا ہے ۔فخر اسماعیل ؑ امام عالی مقام ؓ نے اپنی بے مثال قربانی سے اسلام کو نئی زندگی عطا کی۔محرم الحرام کا مقدس مہینہ ہمیں درس دیتا ہے کہ امام حسین ؓ کے نقش قدم پر چلتے ہوئے باطل قوتوں کا مقابلہ کریں۔صوبائی وزیر نے کہا کہ واقعہ کربلا ہمیں اسوہ حسینیؓ پر عمل کرتے ہوئے باطل کے خلاف ڈٹ جانے اور حق کا ساتھ دینے کا درس دیتاہے۔ رانا مشہود نے اپنے پیغام میں کہا کہ حضرت اما م حسین ؓکے راستے پر چلتے ہوئے ہی عدم برداشت کا خاتمہ ہو سکتاہے۔ ظلم کے خلاف ڈٹ جانا انسانیت کا اعلیٰ ترین مقام ہے۔