فیصل آباد،کسانوں کوزرعی مشوروں و تکنیکی رہنمائی کی فراہمی میں آسانی کے لئے ضلعی محکمہ زراعت کے فیلڈ سٹاف کو 151 ہیوی ڈیوٹی موٹر سائیکلز فراہم کی گئی

فیصل آباد(اُردو پوائنٹ تازہ ترین اخبار۔ 25 ستمبر - 2016ء) وزیر اعلی پنجاب محمد شہباز شریف کے ویژن کے مطابق کسانوں کو ان کی دہلیز پر زرعی مشوروں و تکنیکی رہنمائی کی فراہمی میں آسانی کے لئے ضلعی محکمہ زراعت کے فیلڈ سٹاف کو 151 ہیوی ڈیوٹی موٹر سائیکلز فراہم کی گئی ہیں اس سلسلے میں موٹر سائیکلز کی چابیاں تقسیم کرنے کی تقریب ایوب زرعی تحقیقاتی ادارہ کی لائبریری ہال میں منعقد ہوئی ۔

ڈی سی او سلمان غنی ‘ ارکان صوبائی اسمبلی حاجی خالد سعید اور نعیم الله گل نے فیلڈ سٹاف میں موٹر سائیکلز کی چابیاں تقسیم کیں ۔ ای ڈی او زراعت چوہدری عبدالحمید ‘ ڈی او زراعت شبیر افضل وڑائچ اور محکمہ زراعت کے دیگر افسران بھی اس موقع پر موجود تھے ۔ڈی سی او سلمان غنی نے تقریب سے خطاب کرتے ہوئے کہا کہ موٹر سائیکلز کی فراہمی کے اس اقدام سے نہ صرف فیلڈ سٹاف کے لئے سفر کی آسانیاں پیدا ہونگی بلکہ کسانوں تک جدید زرعی ٹیکنالوجی بروقت پہنچانے میں بھی مدد ملے گی جس کی بدولت زراعت پر مثبت اثرات مرتب ہونگے ۔

(جاری ہے)

انہوں نے موٹر سائیکلز کو اصل مقاصد کے لئے بروئے کار لانے اور اسکی بہتر دیکھ بھال کرنے کی تاکید کرتے ہوئے کہا کہ فیلڈ سٹاف کو اس سہولت کی پائیداری کے لئے ذمہ دارانہ طرز عمل اختیار کرنا چاہئے۔ ارکان صوبائی اسمبلی حاجی خالد سعید اور نعیم الله گل نے زرعی شعبے کے استحکام کے لئے وزیر اعلی پنجاب محمد شہباز شریف کے انقلابی اقدامات کا ذکر کرتے ہوئے کہا کہ اربوں روپے کے زرعی پیکج کی بدولت کسان اور ملک خوشحال ہو گا ۔

انہوں نے فیلڈ سٹاف کو ہیوی ڈیوٹی موٹر سائیکل کی سہولت فراہم کرنے کے اقدام کو خوش آئند قرار دیتے ہوئے کہا کہ فرائض کی ادائیگی میں آسانی سے محکمانہ کارکردگی میں مزید اضافہ ہو گا ۔ ای ڈی او زراعت نے بتایا کہ ان موٹر سائیکلز کے اپریشنل اخراجات حکومت پنجاب برداشت کرے گی جبکہ فیلڈ سٹاف کا شتکاروں کے پاس پہنچ کر اسے زمین کے تجزیہ ‘ کھادوں کے استعمال ‘ فصل کی دیکھ بھال کے اس سلسلے میں پہلے سے بہتر انداز میں مشاورتی خدمات فراہم کر سکے گا ۔