اقوام متحدہ شام میں امدادی سرگرمیوں کی بحالی کی تیاریوں میں مصروف

نئے امدادی قافلے تیار ہیں اور انہیں کسی بھی وقت اپنا کام شروع کرنے کے لیے کہا جا سکتا ہے،ترجمان

جمعرات 22 ستمبر 2016 13:23

نیویارک(اُردو پوائنٹ اخبارتازہ ترین - این این آئی۔22 ستمبر۔2016ء) اقوام متحدہ نے کہاہے کہ وہ شام میں انسانی بنیادوں پر امداد کی ترسیل کی تیاری کر رہا ہے اور جلد ہی امدادی قافلے ایک بار پھر عام شہریوں تک امداد کی فراہمی کے لیے روانہ کیے جائیں گے۔

(جاری ہے)

میڈیارپورٹس کے مطابق دو روز قبل ایک امدادی قافلے پر ممکنہ طور پر ایک فضائی حملے میں 21 افراد کی ہلاکت کے بعد اس عالمی ادارے نے شام میں اپنی امدادی سرگرمیاں عارضی طور پر معطل کر دی تھیں۔

اقوام متحدہ کے انسانی امداد کے رابطہ دفتر کے ایک ترجمان نے بتایا کہ نئے امدادی قافلے تیار ہیں اور انہیں کسی بھی وقت اپنا کام شروع کرنے کے لیے کہا جا سکتا ہے۔ پیر کو حلب شہر میں امدادی قافلے پر حملے کے حوالے سے اقوام متحدہ نے تحقیقات کا اعلان بھی کر دیا ہے۔