چیچہ وطنی میں این اے 162 کے ضمنی الیکشن کیلئے ووٹنگ جاری

Mian Nadeem میاں محمد ندیم پیر 19 ستمبر 2016 11:07

چیچہ وطنی میں این اے 162 کے ضمنی الیکشن کیلئے ووٹنگ جاری

چیچہ وطنی (اردو پوائنٹ اخبارتازہ ترین-انٹرنیشنل پریس ایجنسی۔19 ستمبر۔2016ء) ضلع ساہیوال کی تحصیل چیچہ وطنی میں این اے 162 کے ضمنی الیکشن کیلئے ووٹنگ جاری ہے۔ تحریک انصاف اپنی نشست دوبارہ پانے کیلئے سرگرم ہے جبکہ نون لیگ ٹف ٹائم دینے کے لیے تیار ہے، پولنگ کے دوارن سیکیورٹی کے سخت انتظامات کیے گئے ہیں۔ضمنی انتخاب میں پی ٹی آئی کے رائے محمد مرتضیٰ اقبال ، نون لیگ کے چوہدری محمد طفیل جٹ اور پیپلزپارٹی کے شہزاد سعید چیمہ میں سخت مقابلہ متوقع ہے۔

این اے 162 چیچہ وطنی شہر ،کسوال اور ہڑپہ کی دیہی آبادی پر مشتمل ہے، اس حلقے میں رجسٹرڈ ووٹرز کی تعداد 3 لاکھ 6 ہزار سے زائد ہے، جن میں سے ایک لاکھ 74 ہزار مرد اور ایک لاکھ 32 ہزار خواتین ووٹرز ہیں۔ حلقے میں پولنگ کا عمل صبح 8 بجے شروع ہوا جو شام 5 بجے تک بلا تعطل جاری رہے گا۔

(جاری ہے)

حلقے میں 293 پولنگ اسٹشینز قائم کئے گئے ہیں ان میں سے 22کوحساس ترین قرار دیا گیا ہے۔

پولیس کے ساتھ پاک فوج بھی پولنگ اسٹیشنز کے اندر اور باہر سیکورٹی کے فرائض سرانجام دے رہی ہے۔ پولنگ کے عمل کو شفاف بنانے کے لیے پریزائیڈنگ آفیسر اور پاک فوج کے افسر کو مجسٹریٹ کے خصوصی اختیارات دیئے گئے ہیں تاکہ شر پسند عناصر کو موقع پر ہی سزا دی جاسکے۔اس نشست پر 2013 کے عام انتخابات میں تحریک انصاف کے امیدوار رائے حسن نواز کامیاب ہوئے تھے تاہم انہیں اپنے اثاثے چھپانے کے باعث نااہل قرار دیا گیا تھا۔ ضمنی انتخاب میں رائے حسن نواز کے بھتیجے رائے محمد مرتضیٰ اقبال خان تحریک انصاف کے امیدوار ہیں جب کہ مسلم لیگ نون کے چوہدری محمد طفیل جٹ اور پاکستان پیپلزپارٹی کے شہزاد سعید چیمہ کے علاوہ 4 آزاد امیدوار بھی انتخابی میدان میں ہیں۔

متعلقہ عنوان :