حکومت گرنے کی افواہیں پھیلانے والے اپنے مقاصد میں کامیا ب نہیں ہونگے،آئندہ الیکشن میں بھی ہم فاتح ہونگے ،ہمارا شیوہ جھوٹ ، تہمت اور الزام تراشی نہیں ، ہم اقتدار نہیں اقدار کی سیاست کر رہے ہیں، پوری دنیا نے پاکستان کی تیزتر ترقی کو تسلیم کیاہے ، حکومتی اصلاحات کے باعث بجلی کے کارخانے ہر جگہ لگ رہے ہیں،آئندہ دو سال بعد ملک میں لوڈ شیڈنگ ختم ہو جائے گی ، راولپنڈی کے پیشنگوئیاں کرنے والے سیاستدان کو آئندہ الیکشن میں اسمبلی ممبر بننے کاموقع نہیں ملے گا

کالا شاہ کاکو( اُردو پوائنٹ اخبارتازہ ترین - آئی این پی۔2 ستمبر ۔2016ء ) وزیر اعظم میاں محمد نواز شریف نے کہاہے کہ آئندہ دو سال بعد ملک میں لوڈ شیڈنگ ختم ہو جائے گی ،ہم نہیں پوری دنیا کہہ رہی ہے کہ پاکستان آگے بڑھ رہا ہے ، حکومت کی اصلاحات کے باعث بجلی کے کارخانے ہر جگہ لگ رہے ہیں،ہمارا شیوہ جھوٹ ، تہمت اور الزام تراشی نہیں ، ہم اقتدار نہیں اقدار کی سیاست کر رہے ہیں ، راولپنڈی کا ایک سیاستدان حکومت کے جانے کی افواہیں پھیلا رہا ہے مگر وہ اپنے مقصد میں کامیاب نہیں ہو گا ، انشاء اﷲ آئندہ انتخابات میں بھی کامیابی ہماری ہو گی۔

وہ جمعہ کو یہاں 16.5 کلو میٹر طویل ایسٹرن لاہور بائی پاس منصوبے کے افتتاح کے موقع پر عوامی اجتماع سے خطاب کررہے تھے ۔انہوں نے اس منصوبے کو وہاں کے لوگوں کے لئے تحفہ قرار دیا ۔

(جاری ہے)

انہوں نے کہا کہ پاکستان کی ترقی کے ایجنڈے پر اب بھی قائم ہوں ۔ انہوں نے کہا کہ پاکستان کو ترقی پر ہمکنار کرنا میرا کام ہے ۔ مجھے کالا شاہ کاکو کے عوام کی محبت یاد ہے جنہوں نے ججز بحالی تحریک میں بھرپور حصہ لیا تھا ۔

انہوں نے بغیر نام لئے کچھ لوگوں پر تنقید کا نشانہ بناتے ہوئے کہا کہ کچھ لوگ صبح کچھ کہہ رہے ہیں اور شام کو کچھ اور جو ہماری پالیسی نہیں ہے ۔وزیر اعظم نواز شریف نے کہا کہ آئندہ دو سال بعد ملک میں لوڈ شیڈنگ ختم ہو جائے گی ۔ یہ میں نہیں کہہ رہا ہوں دنیا کہہ رہی ہے کہ پاکستان آگے بڑھ رہا ہے ۔ بلوچستان آج حکومت کی توجہ کا مرکز بن چکا ہے ہر شعبے پر نظر ہے اور نتائج آنا شروع ہو گئے ہیں ۔

ہمارا شیوہ جھوٹ ، تہمت اور الزام تراشی نہیں ہے، ہم اقتدار کی نہیں اقدار کی سیاست کر رہے ہیں اور حکومت کی اصلاحات کے باعث بجلی کے کارخانے ہر جگہ لگ رہے ہیں ۔ حکومتی اقدامات کے باعث ملک بھر میں بجلی کی لوڈ شیڈنگ کم ہو چکی ہے ۔ 2018 میں توانائی بحران کا مکمل خاتمہ ہو جائے گا ۔انہوں نے کہا کہ پنڈی کا ایک سیاستدان حکومت جانے کی افواہیں پھیلا رہا ہے مگر وہ اپنے مقصد میں کامیاب نہیں ہو گا ۔

اسے آپ اچھی طرح جانتے ہیں کبھی وہ کہتا ہے مارچ میں کچھ ہونے والا ہے کبھی کہتا ہے اکتوبر میں کچھ ہو گا ۔ وزیر اعظم نے چیلنج کرتے ہوئے کہا کہ تم تیاری کرو ، آئندہ آپ کو اسمبلی کا ممبر بننے کا موقع بھی نہیں ملے گا انشاء اﷲ آئندہ انتخابات میں بھی کامیابی ہماری ہو گی ۔ ضمنی انتخابات میں کامیابیاں حکومت کی مقبولیت کا ثبوت ہیں ۔ موجودہ حکومت کا ایجنڈہ صرف عوام کی خدمت ہے ۔