اگلےدوروزمیں رینجرزاختیارات میں توسیع ہوجائیگی۔چوہدری نثارعلی خان

ٹیکسلا(اردوپوائنٹ تازہ ترین اخبار۔30جولائی2016ء) :وفاقی وزیرداخلہ چوہدری نثار علی خان نے رینجرز اختیارات میں توسیع کو متنازع بنانے پر تشویش کا اظہار کرتے ہوئے کہا ہے کہ رینجرز کو سندھ میں مکمل اختیارات دیے جارہے ہیں،اگلے دو روز میں رینجرز اختیارات میں توسیع ہوجائے گی،سندھ میں نئے کپتان کی بیٹنگ کے بعد ہی آپریشن کی بہتری کاتجزیہ کرسکیں گے،ہمارے پاسپورٹ کے راستے میں رکاوٹیں کھڑی کرنے والوں سے ہم اچھا سلوک نہیں کرسکتے۔

انہوں نے آج یہاں میڈیا سے گفتگو کرتے ہوئے کہا کہ رینجرز کو سندھ میں مکمل اختیارات دیے جارہے ہیں۔رینجرز اختیارات میں توسیع کو متنازع بنانے پر تشویش ہے۔اگلے دو روز میں رینجرز اختیارات میں توسیع ہوجائے گی۔انہوں نے کہا کہ اختیارات میں توسیع سب کے مفاد میں ہے۔

(جاری ہے)

بہتر یہی ہے کہ کراچی کا امن بحال ہو۔کسی کوکوئی ابہام نہیں ہونا چاہیے شک نہیں ہونا چاہیے کیونکہ رینجرز وفاقی وزارت داخلہ کے ماتحت ہے۔

انہوں نے کہا کہ کراچی میں امن وامان کی صورتحال کوبہتر کرنے کیلئے2013ء میں رینجرز کو بلایا گیا۔اب یہ نہیں ہوسکتاکہ رینجرز کو اختیارات بھی نہ دیں اور اچھے کی امید بھی رکھیں۔انہوں نے کہا کہ وفاقی حکومت رینجرز کو مکمل طور پر سپورٹ کرے گی جبکہ صوبائی حکومت سے توقع ہے کہ معاونت کرے۔چوہدری نثار نے کہا کہ سندھ آپریشن صوبائی حکومت کی مشاورت سے شروع ہوا۔

جبکہ عدالت کے احکامات بھی شامل ہیں۔انہوں نے کہا کہ آئین کے تحت امن وامان قائم کرنے کیلئے رول ادا کررہے ہیں۔میں نے پہلے ہی کہاتھا کہ قائم علی شاہ سندھ آپریشن کپتان ہونگے۔ نئے وزیراعلیٰ سندھ سے پرامید ہوں کہ کراچی میں آپریشن پہلے سے بھی بہتر انداز میں ہوگا۔سندھ میں نئے کپتان کی بیٹنگ کے بعد ہی ہم تجزیہ کرسکیں گے۔وفاقی وزیرداخلہ نے کہا کہ کویت معاملے پر ہم ہر ملک سے اچھے تعلقات چاہتے ہیں۔

ویزہ پالیسی کے حوالے سے بڑی تبدیلی لائے ہیں۔اب جو ملک ہمارے ساتھ برا سلوک کرتا ہے ہم بھی ان کے ساتھ ویسا سلوک کرتے ہیں۔پہلے صرف پی آئی اے کو جرمانے ہوتے تھے۔اب غیرملکی ایئرلائنز کو بھی جرمانے ہوتے ہیں۔انہوں نے کہا کہ ہمارے پاسپورٹ کے راستے میں رکاوٹیں کھڑی کرنے والوں سے ہم اچھا سلوک نہیں کرسکتے۔