ٹوئٹر پر’رینجرز لا سندھ بچا‘کے نام سے ہیش ٹیگ ٹاپ ٹرینڈ کرتا رہا

بدھ 27 جولائی 2016 19:56

کراچی(اُردو پوائنٹ اخبارتازہ ترین - این این آئی۔27 جولائی ۔2016ء) کراچی میں رینجرز اختیارات کا معاملہ زور پکڑ گیا اور اب اس کا شور سماجی رابطے کی ویب سائٹ ٹوئٹر پر بھی سنا جاسکتا ہے جہاں صارفین نے رینجرز لا سندھ بچا کے نام سے ہیش ٹیگ بنایا جو ٹاپ ٹرینڈ کرتا رہا۔کراچی میں قیام امن کے لئے رینجرز اختیارات کی مدت مکمل ہوگئی جس کے بعد توسیع کا معاملہ پہلے کی طرح ایک مرتبہ پھر طول پکڑ گیا ہے جس پر ٹوئٹر صارفین اپنے خیالات کا اظہار کر رہے ہیں۔

اس سلسلے میں رینجرز لا سندھ بچا کے نام سے ہیش ٹیگ بنایا گیا ہے جہاں صارفین دلچسپ اور تنقید سے بھرپور خیالات کا اظہار کررہے ہیں۔ذیشان خان اپنی ٹوئٹ میں لکھتے ہیں کہ کراچی اور سندھ میں امن اور خوشحالی کی واحد امید سندھ رینجرز ہے۔

(جاری ہے)

حادیہ ملک سندھ حکومت کی جانب اشارہ کرتے ہوئے لکھتی ہیں کہ یہ لوگ رینجرز اختیارات کے معاملے میں تاخیری حربے استعمال کر رہے ہیں اور یہ اس گمان میں ہیں کہ کراچی کے حالات ان کے کنٹرول میں ہیں اوراب تک کچھ نہیں ہوا۔

عمر اپنے خیالات کا اظہار کرتے ہوئے لکھتے ہیں کہ سندھ رینجرز کو تمام اختیارات حاصل ہونے چاہئیں۔اقرا لکھتی ہیں کہ گزشتہ روز سیکیورٹی فورسز کے 2 جوانوں کی شہادت کے بعد یہ بات صاف ظاہر ہے کہ کراچی اور سندھ کے حالات صرف رینجرز ہی کنٹرول کرسکتی ہے۔ماہ جبین اپنی ٹوئٹ میں لکھتی ہیں کہ سندھ حکومت کو اپنی نااہلی کا اعتراف کرلینا چاہیئے جس کی وجہ سے صوبے میں اس طرح کے حالات ہیں۔شاہ زیب اپنی ٹوئٹ میں لکھتے ہیں کہ دہشت گرد رینجرز اور فوج پر حملے کر رہے ہیں کیوں کہ یہی دونوں ان کی راہ میں رکاوٹ ہیں۔