مجھے عمران خان کے علاوہ کوئی اُمید نظر نہیں آئی اس لیے تحریک انصاف میں شمولیت اختیار کی ۔ نعیم بخاری

سمیرا فقیرحسین بدھ 27 جولائی 2016 14:34

اسلام آباد (اُردو پوائنٹ تازہ ترین اخبار۔27 جولائی2016ء) : معروف قانون دان نعیم بخاری نے حال ہی میں پاکستان تحریک انصاف میں شمولیت اختیار کی لیکن پی ٹی آئی ہی میں کیوں شمولیت اختیار کی یہ بات آج تک انہوں نے بتائی۔ نجی ٹی وی چینل کے ایک پروگرام میں میزبان نے جب نعیم بخاری سے سوال کیا کہ آپ نے باقی تمام جماعتیں چھوڑ کر پی ٹی آئی ہی میں شمولیت اختیار کیوں کی۔

(جاری ہے)

تو انہوں نے جواب دیا کہ یا تو میں مولانا فضل الرحمان کی پارٹی میں جاتا اور ڈیزل مانگ لیتا، یا دبئی جا کر آصف زرداری سے ملاقات کر لیتا، یا لندن میں الطاف حسین کے قدموں میں گر جاتا یا پھر لندن ہی میں میاں صاحب کی ہارٹ سرجری کے وقت خوشامد کرتا اور شامل ہو جاتا۔ میں نے یہ سب نہیں کیا۔ نعیم بخاری نے کہا کہ ایسے میں مجھے محض ایک ہی اُمید نظر آئی اور وہ عمران خان تھے جس کے بعد میں نے پاکستان تحریک انصاف میں شمولیت کا فیصلہ کر لیا۔