سپریم کورٹ نے پنجاب میں بڑھتی ہوئی اغوا کی وارداتوں پر ازخود نوٹس لے لیا‘ انسپکٹر جنرل پنجاب پولیس اورایڈووکیٹ جنرل پنجاب سے رپورٹ طلب

میاں محمد ندیم منگل 26 جولائی 2016 16:58

اسلام آباد(اردو پوائنٹ اخبارتازہ ترین-انٹرنیشنل پریس ایجنسی۔26جولائی۔2016ء) قائم مقام چیف جسٹس میاں ثاقب نثار نے پنجاب میں بڑھتی ہوئی اغوا کی وارداتوں پر ازخود نوٹس لے لیا۔ازخود نوٹس میں قائم مقام چیف جسٹس کی جانب سے صوبہ پنجاب میں بڑھتی اغوا کی وارداتوں پر تشویش کا اظہار کرتے ہوئے کہا گیا ہے کہ میڈٰیا رپورٹس کے مطابق گزشتہ کچھ عرصے میں پنجاب میں 600 بچے اغواءہوئے، اور صرف لاہور شہر سے کچھ عرصے کے دوران 300 بچوں کو اغواءکیا گیا۔

(جاری ہے)

عدالت نے انسپکٹر جنرل پنجاب پولیس اورایڈووکیٹ جرنل پنجاب سے رپورٹ طلب کرتے ہوئے فریقین کو نوٹس جاری کردیا۔ازخود نوٹس کیس کی سماعت 28 جولائی کو سپریم کورٹ لاہور رجسٹری میں ہوگی۔واضح رہے کہ گزشتہ چند ہفتوں کے دوران لاہور سمیت پنجاب سے متعدد بچوں کو اغوا کیا جاچکا ہے اور وقت گزرنے کے ساتھ ساتھ صورتحال تشویشناک ہوتی جارہی ہے۔چند روز قبل وزیر اعلیٰ پنجاب شہباز شریف نے بھی صوبے میں بچوں کے اغوا کے بڑھتے ہوئے واقعات کو نوٹس لیتے ہوئے متعلقہ حکام سے رپورٹ طلب کی تھی، لیکن اس حوالے سے اب تک کوئی پیش رفت سامنے نہیں آئی ہے۔بچوں کی تلاش کے لیے پولیس کی خصوصی ٹیمیں بھی تشکیل دی جاچکی ہیں، جبکہ حساس ادارے بھی اس سلسلے میں پولیس کی معاونت کر رہے ہیں۔