سینیٹ میں اپوزیشن رکن سینیٹر تاج حیدر کی طرف سے قومی احتساب آرڈیننس 1999ء میں مزید ترمیم کا بل کثرت رائے سے مسترد

پیر 18 جولائی 2016 20:42

اسلام آباد ۔18 جولائی(اُردو پوائنٹ اخبارتازہ ترین - اے پی پی۔18 جولائی ۔2016ء ) ایوان بالا میں اپوزیشن کی اکثریت کے باوجود سینیٹ نے اپوزیشن رکن سینیٹر تاج حیدر کی طرف سے قومی احتساب آرڈیننس 1999ء میں مزید ترمیم کرنے کا بل قومی احتساب (ترمیمی) بل 2015ء کثرت رائے سے مسترد کردیا۔ پیر کو ایوان بالا کے اجلاس میں سینیٹر تاج حیدر نے تحریک پیش کی کہ قومی احتساب آرڈیننس 1999ء میں مزید ترمیم کرنے کا بل قومی احتساب (ترمیمی) بل 2015ء قائمہ کمیٹی کی رپورٹ کردہ صورت میں فی الفور زیر غور لایا جائے جس کی حکومت نے مخالفت کی۔

وفاقی وزیر قانون زاہد حامد نے کہا کہ حکومت بھی چاہتی ہے کہ قانون میں ترمیم ہو، میں ان وکلاء میں شامل رہا جنہوں نے اس قانون کی سب سے پہلے مخالفت کی۔ پیپلز پارٹی کے ساتھ میثاق جمہوریت کی روشنی میں قومی احتساب بیورو کمیشن کے حوالے سے پیشرفت نہ ہو سکی۔

(جاری ہے)

سینیٹر تاج حیدر نے کہا کہ صوبائی خودمختاری کے لئے یہ بل بہت ضروری ہے‘ بل پاس نہ کرنا صوبائی خودمختاری پر ضرب ہوگی۔ سینیٹر عثمان کاکڑ اور بعض دیگر ارکان نے بھی بل کی حمایت کی۔ چیئرمین نے بل پر ارکان کی رائے حاصل کی۔ ارکان کی اکثریت نے رائے شماری میں بل کو مسترد کردیا۔ بل کے حق میں 22 جبکہ مخالفت میں 23 ارکان نے رائے دی۔ اس طرح بل کثرت رائے سے مسترد کردیا گیا۔