اسلام اور پاکستان دشمنوں کے خلاف اتحاد کا عہد کیا جائے‘شجاعت حسین، پرویزالٰہی ، مونس الٰہی

لاہور ( اُردو پوائنٹ تازہ ترین اخبار۔8 جولائی- 2016ء) پاکستان مسلم لیگ کے صدر و سابق وزیراعظم چودھری شجاعت حسین اور سینئرمرکزی رہنما و سابق نائب وزیراعظم چودھری پرویزالٰہی اور مونس الٰہی نے کہا ہے کہ پاکستان اور اسلام دشمنوں کے عزائم ناکام بنانے کیلئے ان کے خلاف اتحاد کا عہد کیا جائے۔ وہ گجرات میں نماز عید کے بعد عید ملنے والوں اور میڈیا سے گفتگو کر رہے تھے۔

ا یک سوال کے جواب میں چودھری شجاعت حسین نے کہا وزیراعظم اور وزراء تو ملک سے باہر ہے پاکستان کو اللہ ہی چلارہاہے ،حکمران خود تو ہیڈر میں شوپنگ کر رہے ہیں یہاں غریب پینشنر مارے مارے پھر رہے ہیں چودھری پرویز الہٰی۔ انہوں نے کہا کہ اللہ کریم ہمارے بزرگوں کی جدوجہد، قربانیوں اور دعاؤں سے رمضان المبارک میں قائم ہونے والی اسلامی جمہوریہ پاکستان کی سلامتی و یکجہتی کی حفاظت کرے، اسے خوشحالی دے، بداَمنی، لوڈشیڈنگ اور دیگر بحرانوں سے نجات دلائے۔

(جاری ہے)

انہوں نے کہا کہ اللہ کریم حرمین شریفین کو نشانہ بنانے والے بدبختوں کے عزائم کو ناکام بنائے، ہمیں پاکستان کو اسلامی فلاحی مملکت بنانے کی توفیق اور ہمت عطا فرمائے، ایک ایسی مملکت جو نہ صرف تمام اسلامی ملکوں بلکہ پوری دنیا کیلئے ایک نمونہ ثابت ہو۔ انہوں نے پاکستان کیلئے جانیں قربان کرنیوالے پاک فوج، پولیس اور دیگر سکیورٹی فورسز کے افسروں، جوانوں اور شہریوں کو خراج عقیدت پیش کرتے ہوئے کہا کہ ہر پاکستانی ان کا ممنون ہے کیونکہ ان شہداء کی قربانیوں کی بدولت ہی آج ہم آزادی سے یہ تہوار منا رہے ہیں۔

انہوں نے بداَمنی کا شکار ہونیوالوں کے اہل خانہ سے دلی ہمدردی کا اظہار کرتے ہوئے کہا کہ قوم ان کے دکھ میں برابر کی شریک ہے، اللہ تعالیٰ امت مسلمہ اور ہمارے معاشرہ میں بداَمنی پیدا کرنیوالوں کو بھی اسلامی تعلیمات پر عمل کرنے کی توفیق دے اور ہماری اس مملکت خداداد کے تمام حصوں میں مکمل امن قائم ہو۔ مسلم لیگی قائدین نے کہا کہ ہمیں آج شہداء کے خاندانوں کو یاد رکھنا چاہئے اور بیواؤں، یتیموں کو عید کی خوشیوں میں شامل کریں۔

چودھری شجاعت حسین، چودھری پرویزالٰہی، چودھری وجاہت حسین اور خاندان کے دیگر افراد نے نماز عید گجرات میں پارٹی رہنماؤں، عہدیداروں، کارکنوں اور ہر شعبہ حیات کے نمائندوں سمیت ہزاروں افراد کے ہمراہ ادا کی۔ نماز کی ادائیگی کے بعد لوگوں کی بڑی تعداد نے مسلم لیگی قائدین سے مصافحہ و معانقہ کیا۔ انہوں نے قبرستان بھٹیاں میں چودھری ظہورالٰہی شہید، چودھری منظور الٰہی اور اپنے دیگر مرحومین کی قبروں پر پھولوں کی چادریں چڑھائیں اور فاتحہ خوانی کی۔ بعد ازاں انہوں نے عید ملنے کیلئے آنے والے سیاسی رہنماؤں و کارکنوں، صنعتکاروں، تاجروں اور عوام کی بہت بڑی تعداد سے ملاقاتیں کیں۔