اپوزیشن کا احتجاج نہیں حکومتی لوٹ مارانتشار اور فساد کی جڑ ہے‘ عید کے بعد (ن) لیگی حکومت کی الٹی گنتی شروع ہو جائیگی ۔چوہدری سرور

محمد علی منگل 5 جولائی 2016 19:38

لاہور(اْردو پوائنٹ اخبارتازہ ترین-انٹرنیشنل پریس ایجنسی05 جولائی ۔2016ء ) سابق گو رنر پنجاب چوہدری محمدسرور نے کہا ہے کہ عید کے بعد (ن) لیگی حکومت کی الٹی گنتی شروع ہو جائیگی ‘حکمران اپنے سوا ہرکسی کا احتساب چاہتے ہیں ‘ اپوزیشن کا احتجاج نہیں حکومتی لوٹ مارانتشار اور فساد کی جڑ ہے‘کر پشن کیخلاف بولنے والوں سے (ن) لیگ نفرت کرتی ہے ‘پانامہ لیکس میں کر پٹ لوگوں کے چہرے بے نقاب ہو چکے ہیں ‘ملک میں شفاف احتسا ب ہو جائے تو کر پٹ حکمران اقتدار میں نہیں جیلوں میں ہوں گے۔

تحر یک انصاف کے کارکنوں کے وفود سے گفتگو میں سابق گو رنر پنجاب چوہدری محمدسرور نے کہا ہے کہ(ن) لیگ کو اپنی حکومت کا جو حال نظر آرہا ہے اسکی وجہ سے وہ قوم کو بے وقوف بنانے کیلئے اپوزیشن کو تنقید کا نشانہ بنا رہے ہیں مگر وہ جو مر ضی کرلیں قوم انکی کر پشن اور لوٹ مار کیخلاف متحد ہو چکی ہے ۔

(جاری ہے)

انہوں نے کہا کہ کر پشن کیخلاف اگر تحر یک انصاف اور پیپلزپارٹی سمیت دیگر اپوزیشن جماعتیں متحد ہو رہی ہیں تویہ ملک اور قوم کے مفاد میں ہوگا اور جب تمام اپوزیشن جماعتیں سڑکوں پر آجائیں گی تو (ن) لیگ کے پاس اقتدار میں رہنے کا کوئی اخلاقی جواز بھی باقی نہیں رہیگا ۔

انہوں نے کہا کہ جب تک حکمران ملک میں لوٹ مار کے بازار کو ختم نہیں کر دیں گے اس وقت تک تحر یک انصاف خاموش نہیں بیٹھیں گی ۔ انہوں نے کہا کہ (ن) لیگ کے دور حکومت میں کر پشن اور لوٹ مار کے جتنے سیکنڈ لز سامنے آئے ہیں ان کی ماضی میں کوئی مثال نہیں ملتی ۔ انہوں نے کہا کہ (ن) لیگ کے اپنی کر پٹ حکومت بچانے کے تمام ہتھکنڈے ناکام ہوں گے اور انکو عید کے بعد پانامہ لیکس کا معاملہ حل نہ کر نے پر گھر جانا ہی پڑ یگا ۔