کراچی میں مون سون کی بارشوں نے بجلی کا نظام تباہ کر دیا، کئی علاقوں میں 48 گھنٹے گزرنے کے باوجود بھی بجلی غائب

کراچی(اُردو پوائنٹ اخبارتازہ ترین - این این آئی۔29 جون ۔2016ء)کراچی میں مون سون کی بارشوں نے بجلی کا نظام تباہ کر دیاہے ، کئی علاقوں میں 48 گھنٹے گزرنے کے باوجود بھی بجلی غائب ہے جبکہ
ترجمان کے الیکٹرک کا کہنا ہے کہ صرف 40 فیڈرز متاثر ہیں جن پر کام جاری ہے ۔تفصیلات کے مطابق کراچی میں باران رحمت سرکاری اداروں کی غفلت کی وجہ سے زحمت بن کر رہ گئی ۔

کراچی میں مون سون کی بارش آئی اور پھر شہر کے مختلف علاقوں کی بجلی اور پانی چلے گئے ، اڑتالیس گھنٹے گزر گئے اب بھی شہری گرمی اور حبس میں بجلی آنے کے انتظار میں پریشان ہیں۔ بیشتر علاقوں میں نکاسی آب نہ ہونے سے گزر گاہوں پر مسافر پریشان ہیں تو دوسری جانب بجلی بندش لوگوں کا امتحان لے رہی ہے ۔بارش کے ہوتے ہی شہر کے ایک ہزار سے زائد فیڈر ٹرپ کرگئے مگر کے الیکٹرک حکام سب اچھا ہے کہ رٹ لگا رہے ہیں ۔

(جاری ہے)

بارش کے بعد سے کراچی کے مختلف علاقوں میں بجلی کی فراہمی معطل گئی اور شہری شدید پریشانی کا سامنا کر رہے ہیں ۔ گلشن اقبال، ملیر،ایف بی ایریا، سرسید ٹاؤن نارتھ کراچی، طارق روڈاورڈیفنس کے کچھ علاقوں میں بجلی کی فراہمی معطل ہے ۔ شاہ فیصل کالونی نمبر5اور شاہ فیصل کالونی شمع سینٹرمیں بھی گزشتہ روزسے بجلی غائب ہے۔علاوہ ازیں ہل پارک،سندھی مسلم سوسائٹی اورپٹیل پاڑامیں بھی بجلی کی فراہمی معطل ہے۔

گلستان جوہر بلاک 12 میں بھی بجلی کی طویل بندش سے لوگوں کو شدید مشکلات کا سامنا ہے ۔طویل لوڈ شیڈنگ سے تنگ شہری گھروں سے باہر نکلنے پر مجبور ہوگئے ۔ تیس فیصد شہر کو بجلی کی فراہمی معطل ہونے سے 26 کروڑ گیلن پانی بھی فراہم نہ ہو سکا ۔لوگوں کو سحری کی تیاری میں بھی مشکلات کا سامنا کرنا پڑا ، گھروں میں پینے کیلئے پانی تک نہ رہا ۔منگل کی شام شروع ہونے والی بارش کے بعد گرمی اور حبس کے ستائے شہریوں نے تو سکھ کا سانس لیا لیکن سرکاری اداروں کی غفلت نے انہیں پریشان کر کے رکھ دیا ہے۔