شیخ انصرنے دارالحکومت میں پولیو کے قطرے پلوانے کے لئے یوسی چیئر مینوں کو فوکل پرسنز نامزد کر دیا

اسلام آباد (اُردو پوائنٹ اخبارتازہ ترین - آئی این پی۔30 مئی۔2016ء) اسلام آباد کے میئر شیخ انصرعزیز نے دارالحکومت میں پولیو کے قطرے پلانے کی مہموں کے لئے متعلقہ یونین کونسلز کے چیئر مینز کو فوکل پرسنز نامزد کر دیا ہے ۔ جب کہ اسلام آباد سے یونین کونسلز کے نئے منتخب ہونے والے چیئر پرسنزنے پولیو مہموں میں بچوں کو پولیو کے قطرے پلانے کے لئے کمیونٹیز کو متحرک کرنے کے ساتھ ساتھ صحت محافظ کے طور پر کام کرنے کا عزم کیا ۔

انہوں نے یہ عزم نیشنل ایمرجنسی آپریشنز سنٹرمیں پولیو کے خاتمہ کی تازہ ترین صورت حال اور معمول کے حفاظتی ٹیکہ جات بارے دی جانے والی پریذنٹیشن کے دوران کیا ۔ اس موقع پر اسلام آباد کے میئر شیخ انصر عزیز اپنے خصوصی پیغام میں معمول کے حفاظتی ٹیکہ جات سے متعلقہ امور بارے پیش رفت کو یقینی بنانے کے لئیے بھر پور تعاون کا یقین دلایااور کہا کہ میں اسلام آباد کی یونین کونسلز کے نو منتخب چیئر پرسنز کو پولیو مہموں کا فوکل پرسن نامزد کرتا ہوں۔

(جاری ہے)

اس موقع پر ڈاکٹر رانا محمد صفدر نے شرکاء کو پولیو کے وائرس کے پھیلاؤ کے طریقہ کار بارے بریف کیا ۔ انہوں نے کہا کہ ابھی بھی پاکستان میں تقریباً 3کروڑ بچوں کی بنیادی حفاظتی ٹیکہ جات تک رسائی نہیں ہے اور ہر سال تقریباً30لاکھ بچے ویکسئین سے ختم ہو جانے والی بیماری کے باعث ہلاک ہو جاتے ہیں۔ جب کہ دنیا بھر میں ہر سال 350000بچے پولیو میں مبتلا ہو جاتے ہیں۔

ڈاکٹر رانا صفدر نے اپنی پریزنٹیشن میں مزید کہا کہ پولیو کے وائرس پر قابو پانے کا واحد طریقہ اور حل ہر بچے کو پولیو کے قطرے پلانا ہے ۔انہوں نے مقامی حکومتوں کے نمائندوں پر زور دیا کہ وہ ہر پولیو مہم کی تیاری کے سلسلہ میں یونین کونسل کی سطح پر پولیو کے خاتمہ کی کمیٹیوں میں شامل ہوں ۔ بعد ازاں یونین کونسل کے نو منتخب چیئر پرسنز کے مختلف سوالات کے جوابات دئیے گئے۔بریفنگ سیشن میں اسسٹنٹ کمشنر،ڈائریکٹر ہیلتھ سی ڈی اے،حفاظتی ٹیکہ جات کے وفاقی توسیعی پروگرام کے نمائندوں ،شراکت داروں اور نیشنل ایمرجنسی آپریشنز سینٹر کے حکام نے شرکت کی ۔