ہومیو پیتھک طریقہ علاج سو فیصد نتائج کا حامل ، انتہائی سستا، سائنیٹفک اور مضر اثرات سے پاک ہے‘ مقررین

مسئلہ صحت کے فوری ،مستقل حل کیلئے ہومیوپیتھک طریقہ علاج کی ترویج و ترقی ،فروغ کیلئے خصوصی اقدامات کئے جائیں

منگل 24 مئی 2016 19:15

لاہور(اُردو پوائنٹ اخبارتازہ ترین - آئی این پی۔24 مئی۔2016ء) ہومیو پیتھک طریقہ علاج سو فیصد نتائج کا حامل ، انتہائی سستا، سائنیٹفک اور مضر اثرات سے پاک ہے، اس کے تحت سر سے لیکر پاؤں تک تمام بیماریوں کا علاج کامیابی سے کیا جا سکتا ہے، ملک کے مسئلہ صحت کے فوری اور مستقل حل کیلئے ہومیوپیتھک طریقہ علاج کی ترویج و ترقی اور فروغ کیلئے خصوصی اقدامات کئے جائیں۔

ان خیالات کا اظہار پاکستان اورینٹل سوسائٹی آف ہومیوپیتھس کے زیر انتظام گزشتہ روز رسٹاکس کے سائنسی مطالعہ کے موضوع پر ہمدرد سنٹر لٹن روڈ لاہور میں منعقدہ سیمینار سے خطاب کرتے ہوئے ڈاکٹر محمد احمد بھٹی، ڈاکٹر محمد محسن ، ڈاکٹر ظفر اقبال چوہدری، ڈاکٹر ساجد قیوم، ڈاکٹر اقبال سرور، ڈاکٹر تصدق حسین، ڈاکٹر محمد ارشد میو، ڈاکٹر محمد رمضان ہاشمی، ڈاکٹرمحمد افضل میو اور ڈاکٹر سعدیہ رفیق نے کیا۔

(جاری ہے)

انہوں نے کہا کہ ہومیو پیتھک طریقہ علاج کو سائنٹیفک بنیادوں پر سمجھنا ہو گا۔ ڈاکٹر محمد احمد بھٹی نے ہومیو میڈیسن رسٹاکس کے جوڑوں ، ہڈیوں اور پٹھوں کے اثرات اور اسکے شفائی معجزات پر تفصیلی روشنی ڈالی۔ انہوں نے کہاکہ اگر کلاسیکل ہومیو پیتھی کو تھورا سا سائنسی ٹچ دیدیا جائے تو یہ طریقہ علاج پوری دنیا میں مقبول ترین طریقہ علاج ثابت ہو سکتا ہے۔ اس سیمینار کو ڈاکٹر محمد طارق چوہدری اور ڈاکٹر خرم عظیم ڈائریکٹرز فاران فارما کے تعاون سے منعقد کیا گیا۔ سیمینار میں ملک بھر سے مایہ ناز ہومیو ڈاکٹرز کی کثیر تعداد میں شرکت کی۔