خوردبینی جرثوموں کے ذریعے ضرر رساں کیڑوں کاانسداد ممکن ہے ،محکمہ زراعت

اتوار 22 مئی 2016 16:46

راولپنڈی۔22مئی (اُردو پوائنٹ اخبار تازہ ترین۔22 مئی۔2016ء) محکمہ زراعت پنجاب راولپنڈی کے ترجمان کے مطابق زرعی تحقیقاتی اداروں میں خوردبینی جرثوموں کے ذریعے ضرر رساں کیڑوں کے انسداد پر تیزی سے کام ہو رہا ہے تاکہ ماحول دشمن کیڑے مار زہروں کے استعمال کو کم کیا جا سکے۔ یہ کم قیمت اور ماحول دوست خوردبینی جرثومے اگر ماحول کا حصہ بن جائیں تو بہت سے حشرات خود بخود کنٹرول ہو سکتے ہیں۔

(جاری ہے)

ترجمان نے مزید بتایا کہ خوردبینی جرثومے لمبے عرصہ تک زندہ رہنے کی وجہ سے مستقل طور پرہمارے ماحول کا حصہ بن جاتے ہیں جس کی وجہ سے آنے والے موسم میں حشرات کے آنے سے پہلے زیادہ تعداد میں موجود ہوتے ہیں اور کاشتکاروں کو حشرات پر قابو پانے کیلئے کم محنت کرنا پڑتی ہے۔ حشرات کش خوردبینی جرثومے نہ تو انسانوں میں کسی قسم کی بیماریاں پھیلاتے ہیں اور نہ ہی یہ ہمارے ماحول کوکسی قسم کا نقصان پہنچاتے ہیں لہٰذا فصلوں میں ضرر رساں کیڑوں کے انسداد کیلئے ان کا استعمال کار آمد ثابت ہوسکتا ہے۔

متعلقہ عنوان :