اداکارہ ثروت گیلانی ہندی زبان سیکھیں گی

کراچی (اُردو پوائنٹ اخبارتازہ ترین - این این آئی۔20 مئی۔2016ء)پاکستانی اداکارہ ثروت گیلانی اور بشریٰ انصاری بہت جلد عدنان صدیقی کی پروڈکشن میں بننے والے پہلے ڈرامے ”سیتا باگڑی“ میں کام کرتی نظر آئیں گی۔یہ ڈرامہ ہندو اقلیتی قبیلے باگڑی پر بنایا جائے گا۔نجی ٹی وی سے بات کرتے ہوئے ثروت گیلانی کا کہنا تھا میں اس ڈرامے میں سیتا بنی ہوں، جو لڑکیوں کی تعلیم کے لیے سرگرم رہتی ہے اور اپنے علاقے کی غریب بچیوں کو تعلیم دیتی ہے لیکن اس ڈرامے کا پلاٹ صرف تعلیم ہی نہیں بلکہ سیتا کی رومانوی کہانی پر بھی مبنی ہے۔

ثروت نے مزید بتایااس ڈرامے میں بشریٰ انصاری چوڑی بنانے والی فیکٹری کی مالک نندیتا داس بنی ہیں جو سیتا کے گھر میں آنے کے بعد ان کے کرائیدار رتن لال (جبران) سے شادی کرلیتی ہیں جسے سیتا بھی پسند کرتی ہے۔

(جاری ہے)

ثروت کے مطابق اس ڈرامے سے لوگوں کو ایک اہم اور مضبوط پیغام دیا جائے گا۔ان کا کہنا تھااس کہانی میں شائقین کے لیے کئی پیغامات موجود ہیں، اقبال حسین کی ہدایات اور ان ہی کے قلم سے لکھے اس ڈرامے کی کہانی باقی ڈراموں سے کافی مختلف ہوگی، یہ عدنان صدیقی کی پہلی پروڈکشن ہے اور ہم سب اس کے ٹی وی ون پر نشر ہونے کے لیے بہت پرجوش ہیں۔

اس ڈرامے کی ریلیز ستمبر میں متوقع ہے اور کاسٹ فی الحال اس کی شوٹنگ میں مصروف ہے۔ثروت کا مزید کہنا تھا کہ اس ڈرامے کے لیے ایک ہندو لڑکی سوریتا ہمیں ہندی سکھا رہی ہے اور ثقافتی لباس کے حوالے سے بھی آگاہ کر رہی ہے۔