ملک میں سورج بدھ کو بھی سوا نیزے پر رہا، حیدر آباد میں گرمی کا 30 سالہ ریکارڈ ٹوٹ گیا

کراچی(اُردو پوائنٹ اخبارتازہ ترین - این این آئی۔18 مئی۔2016ء) ملک کے میدانی علاقوں میں شدید گرمی کی لہر جاری ہے اور سندھ کے کئی علاقوں میں گرمی کے ریکارڈ ٹوٹ گئے ہیں۔ملک میں بدھ کے روز سب سے زیادہ گرنے لاڑکانہ اور سبی میں پڑی جہاں درجہ حرارت 52سٹی گریڈ ریکارڈ کیا گیا۔ جیکب آباد میں 50.5، تربت، میرپور خاص اور رحیم یار خان میں 50، سبی، سکھر، رحیم یار خان اور شہید بے نظیرآباد میں 49 ، حیدر آباد میں 48.5 ، بہاولپور، پڈعیدن، دادو اور روہڑی میں 48 ، نور پور تھل، فیصل آباد میں 47 جب کہ لاہور اور راولپنڈی میں زیادہ سے زیادہ درجہ حرارت 46 ڈگری ریکارڈ کیا گیا۔

حیدر آباد میں گرمی کا 30 سالہ ریکارڈ ٹوٹ گیا ہے اس سے قبل1986 میں مئی کے مہینے میں درجہ حرارت 49 ڈگری سینٹی گریڈ ریکارڈ کیا تھا۔

(جاری ہے)

کراچی میں زیادہ سے زیادہ درجہ حرارت 39 ڈگری سینٹی گریڈ ریکارڈ کیا گیا لیکن ہوا میں نمی اور کم رفتار کی وجہ سے ہیٹ انڈیکس 41 ڈگری تک ریکارڈ کیا گیا۔محکمہ موسمیات کا کہنا ہے کہ اس وقت ملک میں گرمی کی لہر معمول کے مطابق ہے اور اگر یہ طوالت اختیار کرتی ہے تب ہی پریشانی کا باعث ہوگی تاہم گرمی کی یہ لہر مزید ایک سے دو روز جاری رہ سکتی ہے،آئندہ 24 گھنٹوں کے دوران پختونخوا کے میدانی علاقوں، سکھر، لاڑکانہ، میرپور خاص، شہید بینظیر آباد، سبی اور مکران ڈویژن میں موسم شدید گرم اور خشک رہے گا لیکن مالاکنڈ، ہزارہ، راولپنڈی، گوجرانوالہ، اسلام آباد اور کشمیر میں بعض مقامات پر تیز ہواوں اور گرج چمک کے ساتھ ہلکی بارش ہو سکتی ہے۔

کراچی سمیت پاکستان کے دیگر ساحلی علاقوں میں متغیر رفتار سے چلنے والی سمندری ہواں کی بدولت درجہ حرارت میں دیگر علاقوں نسبت تیزی سے اضافہ نہیں ہو گا۔