پٹھان کوٹ حملہ ہماری انسداد دہشت گردی سکیورٹی میں خامیوں کا نتیجہ ہے ،بھارت کا اعتراف

بدھ 4 مئی 2016 13:53

نئی دہلی(اُردو پوائنٹ اخبارتازہ ترین - آن لائن۔04 مئی۔2016ء) پٹھان کوٹ ایئربیس حملے کی تحقیقات کرنے والی بھارت کی پارلیمانی کمیٹی نے اعتراف کیا ہے کہ ہماری انسداد دہشت گردی سکیورٹی اسٹیبلشمنٹ میں سنجیدہ خامیاں اور ایئربیس کی اندرونی و بیرونی سکیورٹی بھی ناقص تھی جس کے باعث یہ واقعہ پیش آیا ، ہمیں یہ جان کر بہت حیرت ہوئی کہ جس ایئربیس کی سیکیورٹی انتہائی سخت ہونی چاہیے تھی، وہاں مسلح افراد باآسانی داخل ہونے میں کامیاب رہے۔

پینل رپورٹ کے مطابق اس سے ظاہر ہوتا ہے کہ ہماری انسداد دہشت گردی سیکیورٹی اسٹیبلشمنٹ میں سنجیدہ خامیاں ہیں، جبکہ ایئربیس کی اندرونی اور بیرونی سیکیورٹی بھی ناقص تھی۔پارلیمنٹ میں پیش کی جانے والی رپورٹ میں کہا گیا ہے کہ اگر مرکزی حکومت سنجیدہ ہوتی اور انٹیلی جنس ایجنسیاں اپنا کام صحیح طریقے سے انجام دے رہی ہوتیں تو صورتحال مختلف ہوتی۔

(جاری ہے)

پارلیمانی کمیٹی نے تحقیقات کے دوران پٹھان کوٹ ایئربیس کا بھی دورہ کیا اور سوال اٹھایا کہ مبینہ طور پر پاکستان سے آنے والے دہشت گرد، دہشت گردی الرٹ کے باوجود کیسے ایئربیس میں داخل ہونے میں کامیاب ہوئے۔رپورٹ میں حکومت سے کہا گیا ہے کہ وہ پاکستان سے منسلک سرحدی علاقوں کو گشت بڑھانے، باڑ لگانے اور دیگر اقدامات کے ذریعے موثر طریقے سے سیل کرنے کی جانب توجہ دے۔یاد رہے کہ رواں سال 2 جنوری کو پٹھان کوٹ ایئربیس حملے میں 7 ہندوستانی سیکیورٹی اہلکار ہلاک ہوئے تھے۔