عامر خان 7 مئی کو ڈبلیو بی سی ورلڈ مڈل ویٹ ٹائٹل کیلئے ایلواریز کے خلاف رنگ میں اتریں گے

پیر 2 مئی 2016 14:51

لندن ۔ 2 مئی (اُردو پوائنٹ اخبارتازہ ترین - اے پی پی۔02 مئی۔2016ء) شہرہ آفاق پاکستانی نژاد برطانوی باکسر عامر خان 7 مئی کو لاس ویگاس کے مقام پر ساؤل ایلواریز کے خلاف ڈبلیو بی سی ورلڈ مڈل ویٹ ٹائٹل کیلئے رنگ میں اتریں گے۔ 29 سالہ خان نے گزشتہ برس مئی میں نیویارک میں منعقدہ فائٹ میں کرس الجیری کو ہرایا تھا اور اس کے بعد ابھی تک دوبارہ رنگ میں نہیں اترے۔

(جاری ہے)

دوسری جانب ایلواریز نے گزشتہ برس نومبر میں حریف باکسر کو ہرا کر ٹائٹل جیتنے کا اعزاز حاصل کیا تھا، ایلواریز نے 48 مقابلوں میں سے 46 فتوحات حاصل کر رکھی ہیں جبکہ ایک میں انہیں شکست کا سامنا کرنا پڑا تھا۔ عامر خان نے اپنے بیان میں کہا کہ میرا مقصد ہمیشہ بڑے اور بہترین باکسرز کے ساتھ مقابلہ کرنا ہوتا ہے اور یہی وجہ ہے کہ مجھے اس مقابلے پر خوشی ہے، میں جانتا ہوں کہ میں حریف باکسر کو زیر کرنے کی صلاحیت رکھتا ہوں اور میں انہیں ہرانے کیلئے صلاحیتوں سے بڑھ کر کارکردگی دکھانے کی کوشش کروں گا۔

دوسری جانب ایلواریز نے کہا کہ عامر خان سخت حریف ہیں اور ان کے خلاف مقابلہ جیتنے کیلئے بھرپور تیاری کے ساتھ رنگ میں اتروں گا اور مجھے یقین ہے کہ شائقین کو کانٹے دار مقابلہ دیکھنے کو ملے گا۔