نامہ لیکس پر پارلیمنٹ تحقیق نہیں کر سکتی تو پارلیمان کو تالا لگا دیں رحمن ملک

وزیر اعظم کے استعفے کے حوالے سے بلاول بھٹو کا بیان پارٹی پالیسی ہے پاناما سے کوئی تعلق ثابت ہوجائے تو سیاست چھوڑ دوں گا سابق وزیر داخلہ کی میڈیا سے گفتگو

اتوار 1 مئی 2016 15:13

اسلام آباد(اُردو پوائنٹ اخبارتازہ ترین - این این آئی۔01 مئی۔2016ء) سابق وزیر داخلہ رحمن ملک نے کہاہے کہ نامہ لیکس پر پارلیمنٹ تحقیق نہیں کر سکتی تو پارلیمان کو تالا لگا دیں وزیر اعظم کے استعفے کے حوالے سے بلاول بھٹو کا بیان پارٹی پالیسی ہے پاناما سے کوئی تعلق ثابت ہوجائے تو سیاست چھوڑ دوں گا ۔ پاکستان یوتھ ایسوسی ایشن کے ارکان سے ملاقات کے بعد میڈیا سے گفتگو کرتے ہوئے سینیٹر رحمان ملک نے کہا کہ پاناما لیکس پر قانون کے دائرے میں رہ کر تحقیقات کر لی جائیں تو معاملہ آگے نہیں جائیگا ۔

سابق وزیر داخلہ نے کہاکہ وزیر اعظم کے استعفیٰ سے متعلق بلاول بھٹو کا بیان پارٹی پالیسی ہے وزیر اعظم کے استعفیٰ کے معاملے پر بلاول بھٹو کیساتھ ہیں ہمارا مقصد پاکستان کو آگے لے کر جانا ہے ، فورسز اور قانون نافذ کرنے والے اداروں نے اچھا ماحول قائم کیا ہے ۔

(جاری ہے)

انہوں نے کہاکہ آصف زرداری بیمار ہیں اور صحت یاب ہو کر جلد ملک میں واپس آئیں گے ۔

رحمان ملک نے کہا کہ پانا ما لیکس معاملے کو سڑکوں کی بجائے پارلیمنٹ میں حل کیا جائے ، پیپلز پارٹی انتشار کی ساست کیخلاف ہے ۔سینیٹر رحمن ملک نے کہا کہ پیپلزپارٹی کو پی ٹی آئی کے ساتھ منسلک ہونے کی ضرورت نہیں۔ ہماری اپنی ایک بڑی پارٹی ہے۔ رحمن ملک نے کہا کہ حزب اختلاف کی جماعتیں (آج) پیر کو لائحہ عمل طے کریں گی۔ اگر پانامہ لیکس پر پارلیمنٹ تحقیق نہیں کر سکتی تو پارلیمان کو تالا لگا دیں۔ اپنے اوپر لگنے والے الزامات سے متعلق انہوں نے کہا کہ تحقیقات سب راز کھول دیں گی۔ پانامہ لیکس کے حوالے سے مجھ پر بھی الزام ہے۔ کہتا ہوں کہ الزام ثابت کردیں۔