سلیم خان اپنے بیٹے سلمان خان کی حمایت میں میدان میں آگئے

ممبئی(اُردو پوائنٹ اخبارتازہ ترین - این این آئی۔29 اپریل۔2016ء) معروف اسکرپٹ رائٹر سلیم خان نے اپنے بیٹے اور بالی ووڈ کے دبنگ سپر اسٹار سلمان خان کو ریو اولمپکس 2016 کے لیے انڈیا کا خیرسگالی سفیر بنانے کی حمایت کردی ہے۔بالی ووڈ اسٹار سلمان خان بھارتی فلم نگری کا سب سے بڑا نام ہیں جن کے مداحوں کی تعداد کروڑوں میں ہے جب کہ ان کے فلموں میں نبھائے گئے کردار کے اسٹائل نوجوانوں میں بے حد مقبول ہوتے ہیں جس کے باعث ان کی مقبولیت کو دیکھتے ہوئے بھارتی حکومت نے سلو میاں کو ریو اولمپکس 2016 کے لیے اں ڈیا کا خیرسگالی کا سفیر مقرر کیا تھا جس پر ان کی تقرری کے خلاف آوازیں اٹھنا شروع ہوگئی ہیں وہیں ان کی حمایت میں بھی کئی لوگ میدان میں آگئے ہیں جن میں ان کے والد سلیم خان بھی شامل ہیں۔

بالی ووڈ کے نامور فلمساز کرن جوہر کا ایک تقریب میں کہنا تھا کہ سلمان خان فلم نگری کے بڑے اداکار ہیں اور انہوں نے اپنی زندگی میں بہت بڑی کامیابیاں سمیٹی ہیں اسی لیے ان کا نام کھیلوں کو بہتر انداز میں فروغ دے سکتا ہے کیوں کہ وہ جو کرتے ہیں لوگ اسے شوق سے دیکھتے ہیں جب کہ اداکارہ کرن کھیر کا کہنا تھا کہ خیرسگالی سفیر کے طور پر سلمان خان کی مخالفت کرنے والوں کو اپنا دل بڑا کرنا چاہیے اور ان کی عزت کریں کیوں کہ سلمان خان دوسروں کو جذبہ دینے کا نام ہے۔

(جاری ہے)

دوسری جانب سلمان خان کے والد سلیم خان بھی بیٹے کی حمایت میں میدان میں آگئے ہیں اور سماجی رابطے کی ویب سائٹ ٹوئٹر پر اپنے پیغام میں ان کہنا تھا کہ سلمان خان 25 سال سے تنازعات کا شکار ہیں جس سے نکلنے کے لیے میں نے ہمیشہ ان کی مدد کی ہے کیوں کہ وہ صاف گو انسان ہے جب کہ اب سلمان کسی شراب یا تمباکو کی تشہیر نہیں بلکہ کھیلوں کو فروغ کرے گا جس کے لیے میں بھرپور ساتھ دوں گا۔واضح رہے کہ ریو اولمپکس 2016 5 سے 21 اگست تک برازیل میں منعقد ہوگی۔