شکارپور، نامعلوم افراد نے کمرے میں سوئے بہن بھائیوں کو پیٹرول چھڑک کر آگ لگا دی

شکارپور (اُردو پوائنٹ اخبارتازہ ترین - این این آئی۔02 اپریل۔2016ء) شکارپور میں دردناک واقعہ ، نامعلوم وحشیوں نے کمرے میں سوئے ہوئے بہن بھائیوں پر پیٹرول چھڑ ک کر آگ لگادی ، نوجوان لڑکی جل کر جاں بحق ، بہن اور بھائی زخمی ، بھائی کی حالت نازک ، اسپتال داخل۔ تفصیلا ت کے مطابق شکارپور شہر کے لکھیدر تھانے کی حدود شاھی باغ محلہ میں بدرالدین شیخ کے گھرمیں درد ناک واقعہ پیش آیا ، 2 نامعلوم درندہ صفت وحشیوں نے رات کے وقت کمرے میں سوئے ہوئے 3 بہنوں اور ایک بھائی پر پیٹرول چھڑک کر آگ لگا دی اور فرار ہوگئے جس کی وجہ سے 17سالہ نوجوان لڑکی ارم شیخ ، امبرین اور نوجوان برکت علی شیخ جل کر زخمی ہوگئے۔

زخمیوں کو اسپتال داخل کیاگیا جہاں پر زخموں کے تاب نہ لاتے ہوئے ارم شیخ جاں بحق ہوگئی جبکہ برکت علی کی حالت تشویش ناک ہونے پر ڈاکٹرز نے انہیں کراچی اسپتال روانہ کردیا۔

(جاری ہے)

ضابطے کی کارروائی کے بعد متوفیہ ارم کی لاش ورثاء کے حوالے کردی گئی ہے۔ واقعے بعد پورے علاقے میں سوگ کا ماحول بنا ہوا تھا۔ متوفیہ کے والد بدرالدین شیخ نے میڈیا کوبتایا کہ رات کے 3بجے 2 نامعلوم مسلح افراد چوری کی غرض سے گھرمیں داخل ہوئے گھر کے اوپر ایک کمرے میں بچے سوئے ہوئے تھے کہ میری بیٹی ارم کمرے سے باھر نکل کر پانی پینے کے لیے نکلی تو مسلح افراد نے ان کو دیکھ کر تشدد کیا بیہوشی کی حالت میں پھنک کر پیٹرول سے آگ لگادی اور دروازا بند کرکے فرار ہوگئے چیخ وپکار پر ہم پہنچے تو مذکورہ واقعہ دیکھا، ملزمان فرار ہوگئے تھے انہوں نے کہا کہ ہمارے ساتھ بڑا ظلم ہوا ہے اگر انصاف نہیں ملا تو بھرپور احتجاج کریں گے رابطے کرنے تھانیدار طاہر قادری نے بتایاکہ ہم تفتیش کررہے ہیں تفتیش مکمل کرنے کے بعد مقدمہ درج کریں گے جبکہ ایم پی اے امتیاز احمد شیخ نے بدرالدین شیخ سے رابطہ کرکے ہمدردی کا اظہا رکیا ہے