برسلز بم دھماکوں میں جانی نقصان پرافسوس ہے، دھماکے پوری دنیا کا امن تہہ و بالا کرنے کی سازش ہے ،بیگناہوں کا خون بہانے والے انسانیت کے دشمن ہیں

اسلام آباد (اُردو پوائنٹ اخبارتازہ ترین - آئی این پی۔23 مارچ۔2016ء) وفاق المدارس العربیہ پاکستان کے صدر مولانا سلیم اﷲ خان ،جنرل سیکرٹری مولانا محمد حنیف جالندھری ،مولانا ڈاکٹر عبدالرزاق اسکندر اور مولانا انوار الحق نے کہاہے کہ بلجیئم کے دارلحکومت برسلز میں بم دھماکے اور ان کے نتیجے میں ہونے والے جانی نقصان پر افسوس ہے،بم دھماکے پوری دنیا کا امن تہہ و بالا کرنے کی سازش ہے ،بیگناہوں کا خون بہانے والے انسانیت کے دشمن ہیں ،یورپ میں جو مختلف تہذیبوں اور قوموں کا تنوع ہے اسے ختم کرنے کی کوششیں کی جا رہی ہیں ،بدامنی اور حالات خراب کر کے تارکین وطن کو مسائل سے دوچار کیا جا رہا ہے ،عام اور بے گناہ لوگوں کو عالمی قوتوں کی باہمی چپقلش کی بھینٹ چڑھانا کسی طور پر بھی درست نہیں ،دہشت گردی کے عفریت پر قابوپانے کے لئے عالمی برادری کو اپنی پالیسیوں پر نظر ثانی کرنی ہو گی ،ان خیالات کا اظہار برسلز دھماکوں کی مذمت کرتے ہوئے اپنے ایک بیان میں کیا ،وفاق المدارس کے رہنماؤں نے کہا کہ ایک سازش کے تحت بم دھماکوں کے ذریعے افرا تفری پیدا کر کے دنیا کا امن تہہ و بالا کر نے کی کوششیں کی جا رہی ہیں ،بدامنی اور بے گناہ انسانوں کا قتل خواہ وہ دنیا کے کسی بھی کونے میں ہو قابل مذمت ہے ،انہوں نے کہا کہ دنیا بھر میں بسنے والوں کو قیام امن کے لئے اپنے اپنے حصے کا کردار ادا کرنا ہو گا ، بدامنی پھیلانے والے عناصر اور پالیسیوں کے خلاف بھی آواز بلند کرنی ہو گی،انہوں نے کہا کہ دکھ کی اس گھڑی میں برسلز کے عوام کے ساتھ ہیں ۔