اوورسیزپاکستانیز کمیشن پنجاب اور لاہور پولیس کی مشترکہ کارروائی،اغوا ء برائے تاوان کے لئے دی گئی رقم برآمد

لاہور(اُردو پوائنٹ اخبارتازہ ترین - آئی این پی۔17 مارچ۔2016ء) وزیر اعلی پنجاب محمد شہباز شریف سے برطانیہ میں مقیم پاکستانی بزنس مین ظاہر احمد نے ملاقات کی ۔وزیر اعلی نے اوورسیزپاکستانیز کمیشن پنجاب اور لاہور پولیس کی مشترکہ کارروائی کے نتیجے میں اغواء برائے تاوان کیلئے دی جانیوالی 5کروڑ8 لاکھ روپے کی رقم کی برآمدگی کے بعد چیک برطانیہ میں مقیم پاکستانی بزنس مین ظاہر احمدکو دیا۔

وزیر اعلی نے 5کروڑ 8لاکھ روپے بر آمد کرنے پر اوورسیز پاکستانیز کمیشن پنجاب اور لاہور پولیس کی کارکردگی کی تعریف کی اور انسپکٹر جنرل پولیس مشتاق سکھیرا،سی سی پی او لاہور کیپٹن (ر) امین وینس،کمشنر اوورسیز پاکستانی کمیشن پنجاب افضال بھٹی،ڈی جی پولیسنگ اوورسیز پاکستانیز کمیشن، ڈی آئی جی کیپٹن (ر)مبین،ایس پی سی آئی اے عمر ورک،ڈی ایس پی سی آئی اے طارق کیانی اورانسپکٹر شرجیل کو شاباش دی۔

(جاری ہے)

وزیراعلیٰ پنجاب محمد شہبازشریف نے اس موقع پر گفتگو کرتے ہوئے کہا کہ اوورسیز پاکستانیز کمیشن پنجاب اورلاہور پولیس کے بروقت اقدامات کی بدولت برطانیہ میں مقیم پاکستانی بزنس مین ظاہر احمدکی دادرسی ہوئی ہے ۔دونوں اداروں کی مشترکہ کاوش اورکارروائی لائق تحسین ہے۔ انہوں نے کہا کہ اوورسیز پاکستانیز کمیشن پنجاب سمندر پار پاکستانیوں کے مسائل کے حل کیلئے تشکیل دیا گیاہے ۔

کمیشن بیرون ملک مقیم پاکستانیوں کے مسائل کے حل کے حوالے سے شاندارانداز میں کام کررہا ہے ۔برطانیہ میں مقیم پاکستانی بزنس مین ظاہر احمد نے گفتگو کرتے ہوئے کہا کہ اوورسیز پاکستانیز کمیشن پنجا ب کا قیام ایک نعمت سے کم نہیں ۔ہم وزیراعلیٰ شہبازشریف کے بے حد شکرگزار ہیں۔انہوں نے کہا کہ ہمیں اپنی رقم ملنے کی کوئی امید بھی نہ تھی لیکن جس بہترین انداز میں دونوں اداروں نے کام کیا ہے وہ قابل تعریف ہے اور ہمیں اپنی رقم واپس ملی ہے -صوبائی وزیر قانون رانا ثناء اﷲ خان،انسپکٹر جنرل پولیس مشتاق سکھیرا،سی سی پی او لاہور کیپٹن (ر) امین وینس، کمشنراوورسیز پاکستانیز کمیشن پنجاب افضال بھٹی،ڈائریکٹر جنرل پولیسنگ اوورسیز پاکستانیز کمیشن پنجاب ،ڈی آئی جی کیپٹن (ر) مبین،ایس پی سی آئی اے عمر ورک کے علاوہ ظاہر احمد کے بھائی بھی اس موقع پر موجود تھے ۔

واضح رہے کہ ظاہر احمد کو اغواء کر کے 5کروڑ 8لاکھ روپے تاوان وصول کیاگیا تھا۔تاوان کی رقم ملنے کے بعد ملزمان نے ظاہر احمد کو چھوڑ دیا تھا ۔ظاہر احمد نے اوورسیز پاکستانیز کمیشن پنجاب کے پورٹل پر شکایت درج کرائی۔شکایت کے اندراج کے فوری بعد کمیشن اور لاہور پولیس نے مشترکہ کارروائی کر کے تاوان کے لئے وصول کی گئی رقم برآمد کی ۔