سعودی شوہر نے بیوی کا رنگ گوراسے سانولا ہونے پر طلاق دیدی

ظالم شوہر نے بیوی سے رنگ سانولا ہونے کی وجہ پوچھی پھر سسرال فون کرکے بیوی کو لے جانا کاکہا

پیر 14 مارچ 2016 19:06

الریاض(اُردو پوائنٹ اخبارتازہ ترین - این این آئی۔14 مارچ۔2016ء)سعودی عرب میں شوہر نے خوبصورت بیوی کا گورا رنگ سانولا ہونے پر طلاق دیدی،عرب ٹی وی کے مطابق جازان کے علاقے ابو عریش کے ایک شہری جس کی عمر چالیس سال کے لگ بھگ ہے نے شادی کے سات ماہ بعد اپنے سسرال کو پیغام بھیجا کہ وہ اپنی بیٹی کو لے جائیں کیونکہ وہ اسے اپنے ساتھ بیوی کے طورپر نہیں رکھنا چاہتا۔

(جاری ہے)

مطلقہ کا کہنا تھا کہ اس کے شوہر نے طلاق دینے سے قبل پوچھا کہ تمہارے چہرے کا رنگ سفید سے سانولاکیوں ہوتا جا رہا ہے؟ اس نے بتایا میں تین ماہ سے حاملہ ہوں اس لئے میرا رنگ بدلنے لگا ہے، مطلقہ کا یہ بھی کہنا تھا کہ شادی سے قبل بھی اس کا رنگ سفید نہیں تھااس نے اپنے چہرے کا رنگ بیوٹی پارلرسے تبدیل کرانے کی کوشش کی تاہم مصنوعی رنگ جلد ہی اْڑ گیا جس کے بعد اس کا شوہر اس سے ناراض رہنے لگا تھا۔

اس نے مزید بتایا کہ شادی سے قبل اس کے ہونے والے شوہر نے بتایا کہ اس کی ایک اور بیوی بھی ہے جس سے اس کے سات بچے ہیں۔ اس کے باوجود میں اس کیساتھ شادی پرآمادہ ہوگئی تھی۔خاتون نے کہا کہ اس کے تمام ضروری کاغذات بھی شوہر کے پاس ہیں اس لئے وہ اپنے اور پیٹ میں موجود بچے کے حقوق کا مقدمہ لڑنے سے بھی قاصر ہے۔